नंदुरबार l प्रतिनिधी-
शिक्षण संस्था महामंडळातर्फे आज दि.२९ जून २०२४ रोजी राज्यभर पुरकारण्यात आलेले ‘एक दिवस शाळा बंद आंदोलन’ काही दिवसासाठी स्थगित करण्यात आले आहे, अशी माहिती शिक्षण संस्था महामंडळाचे राज्य कार्यवाही तथा माजी आमदार चंद्रकांत रघुवंशी, राज्य कार्यकारिणी सदस्य राजेंद्र गावीत, नाशिक विभागीय कार्यवाह प्रा.डॉ.एन.डी.नांद्रे यांनी दिली आहे.
पाच वर्षापूर्वी शिक्षण संस्थांनी केलेल्या दाव्यानुसार शाळांना वेतन आयोगानुसार अनुदान देण्यात यावे, याबाबत न्यायालयाने संस्थांच्या बाजुने निकाल दिला. त्यानंतर शासनाने आदेशाची अंमलबजावणी करण्यास टाळटाळ केली. तसेच भरती पोर्टलमधील सुधारणेसाठी समिती नेमून त्यात संस्था चालकांना सहभागी करुन घ्यावे, माध्यमिक विद्यालयासाठी १० किलो वॉट व महाविद्यालयासाठी २५ किलो वॉटचे सोलर ऊर्जा शासन खर्चाने बसवावे,
ग्रामीण भागातील स्वयंअर्थसहाय्यित शाळांच्या शिक्षकांना वेतन आयोगानुसार वेतन देण्याचा आग्रह धरु नये आदी मागण्यासाठी शिक्षण संस्था महामंडळातर्फे आज दि.२९ जून २०२४ रोजी राज्यभर पुरकारण्यात आलेले ‘एक दिवस शाळा बंद आंदोलन’ पुकारण्यात आले होते. परंतू मंत्री महोदयांनी अधिवेशन काळात शिक्षण संस्था महामंडळाचे कार्याध्यक्ष तथा माजी केंद्रीय मंत्री विजय नवल पाटील यांच्यासह शिष्ठमंडळाची बैठक घेवून प्रश्न सोडविण्याचे आश्वासन दिले आहे. तसेच नवीन शिक्षण सचिव श्रीमती कुंदन, उपसचिव तुषार महाजन यांच्याशी देखील सकारात्मक चर्चा झाली. त्यामुळे सदरील एक दिवस शाळा बंद आंदोलन काही दिवस स्थगित करण्यात आले आहे.