नंदुरबार l प्रतिनिधी
लोकनेते,माजी आ.स्व.बटेसिंहभैय्या रघुवंशी यांच्या जयंतीनिमित्त रविवार, दि. 13 ऑगस्ट रोजी मोफत सर्व रोग निदान शिबिराचे आयोजन करण्यात आले आहे अशी माहिती माजी आमदार तथा शिवसेनेचे संपर्कप्रमुख चंद्रकांत रघुवंशी यांनी दिली.
छत्रपती मल्टी स्पेशलिस्ट हॉस्पिटल व एस.एम.बी.टी हॉस्पिटल यांच्या संयुक्त विद्यमाने शिबिराचे आयोजन करण्यात आलेले आहे.शिबिरात हृदयरोग, मधुमेह, मेंदू व मणके विकार, हाडांचे व संधिवात रोग, स्त्रीरोग प्रसुती, कॅन्सर व गाठी, नेत्ररोग, किडनी विकार व मूत्रविकार, मुळव्याध व हर्निया हायड्रोसिल, फुफ्फुसांचे विकार, गुडघा व खुबा सांधे रोपण, यकृत पित्ताशय आजार, नाक कान घसा, रक्ताचे आजार,त्वचारोग, ग्रंथीरोग या आजारांवर उपचार करण्यात येणार आहेत.
शासकीय योजनेअंतर्गत येणारे आजारांचे उपचार व शस्त्रक्रिया मोफत करण्यात येईल व जे योजनेत समाविष्ट नाहीत त्या आजारांचे उपचार व शस्त्रक्रिया माफक दरात करण्यात येतील. त्याचप्रमाणे औषध, रक्त चाचण्या, एक्स-रे, सिटीस्कॅन, ईसीजी, इको टूडी वर सूट देण्यात येणार आहे. शिबिरासाठी गुरुवार दि. 10 ऑगस्ट पासून नोंदणीला सुरुवात होणार आहे. रविवार,दि. 13 ऑगस्ट रोजी सकाळी 9 ते दुपारी 2 वाजेपर्यंत छत्रपती मल्टी स्पेशालिटी हॉस्पिटल, बायपास रोड, टर्मिनल समोर, नंदुरबार येथे शिबिर घेण्यात येणार आहे. शिबिराच्या लाभ घेण्याचे आवाहन माजी आमदार तथा शिवसेनेचे संपर्कप्रमुख चंद्रकांत रघुवंशी यांनी केले आहे.
