नंदूरबार l प्रतिनिधी
खापर ता अक्कलकुवा येथील मिराई अँग्रो एजन्सी येथे कृषि विभागाच्या पथकाने धाड टाकत दोन लाखाचे अनाधिकृत एच. टी. बी. टी. कापुस बियाणे जप्त केले आहे.याप्रकरणी संबंधितावर गुन्हा दाखल करण्यात आला आहे.
याबाबत अधिक माहिती अशी खापर ता. अक्कलकुवा येथे गणेश मनोज मराठे, मुकेश मोहन मराठे यांच्या मिराई अँग्रो एजन्सी येथे अनधिकृत कापूस (एच.टी.बी. टी.). वाहतूक, साठवणूक व विक्री बाबत गुप्त माहिती होती.त्यातच कृषि विभागाच्या पथकाने खापर व परिसरात अनाधिकृत कापुस एच.टी.बी. टी. बियाणे दाखल झाल्याची बातमी मिळाली होती.
त्या माहितीच्या आधारे जिल्हा भरारी पथकाने मिराई अँग्रो एजन्सी खापर ता. अ. कुवा येथे दाखल झाले. त्यावेळी सदर दुकानाची तपासणी केली असता दुकानाच्या तिसऱ्या मजल्यावरील खोलीत सिलबंद तीन पोते बियाणे आढळून आले. सदर बियाण्याबाबत गणेश मनोज मराठे, रा. खापर ता. अ. कुवा यांना विचारले असता त्यांनी उडवाउडवीची उत्तरे दिली. भरारी पथकासमक्ष सदरचे पोते उघडले असता 2 लाख 4 हजार 400 रुपये किमतीचे अनाधिकृत कापुस एच.टी.बी. टी. बियाण्याची 146 पाकीटे आढळून आली. सदर कारवाई अंतर्गत भरारी पथकातील मोहीम अधिकारी जे. एस. बोराळे यांनी गणेश मनोज मराठे, मुकेश मोहन मराठे रा. खापर ता. अक्कलकुवा जि. नंदुरबार, मिराई ॲग्रो एजन्सी यांच्याविरूद्ध अनाधिकृत कापुस (एच.टी.बी.टी.) वाहतूक, साठवणूक व विक्री बाबत अक्कलकुवा पोलीस राहण्यात गुन्हा दाखल केला.
सदर कारवाई (भा.प्र.से.) गट विकास अधिकारी, पंचायत समिती अक्कलकुवा पुलकित सिंग यांच्या उपस्थितीत तसेच विभागीय कृषि सहसंचालक, नाशिक विभाग नाशिक मोहन वाघ, जिल्हा अधिक्षक कृषि अधिकारी, नंदुरबार तानाजी खर्डे, कृषि विकास अधिकारी, जिल्हा परिषद नंदुरबार प्रकाश खरमाळे, यांच्या मार्गदर्शनाखाली भरारी पथकातील सदस्य तालुका कृषि अधिकारी अक्कलकुवा निलेश गढरी, तंत्र अधिकारी, कृषि विभाग विजय मोहिते, कृषि अधिकारी योगेश हिवराळे यांच्या पथकाने केली.
शेतकऱ्यांनी अधिकृत दुकानांवरूनच बियाणे खरेदी करावे, त्यामुळे बोगस बियाण्यामुळे शेतकऱ्यांची फसवणूक होणार नाही असे आवाहन विभागीय कृषि सहसंचालक, नाशिक विभाग नाशिक मोहन वाघ यांनी केले आहे.
