नंदुरबार l प्रतिनिधी-
अल्पवयीन मुले व समवयस्क युवकांना पैशांचे आमिष दाखवून त्यांचे लैंगिक शोषण केल्याच्या आरोपातील संशयित चेतन प्रकाश कोळी (वय २२, रा. रायसिंगपुरा, नंदुरबार) याच्या पोलीस कोठडीत न्यायालयाने आणखी सहा दिवसांची वाढ केली आहे. यापूर्वी त्याला १२ ऑगस्टपर्यंत पोलीस कोठडी सुनावण्यात आली होती. त्यानंतर पोलिसांनी त्याला न्यायालयात हजर केले असता तपासासाठी आवश्यक बाबींचा हवाला देत अधिक कोठडीची मागणी करण्यात आली. त्यानुसार न्यायालयाने संशयिताला आता १८ ऑगस्टपर्यंत पोलीस कोठडी सुनावली आहे.
दरम्यान, तपासात संशयिताच्या ताब्यातील मोबाईलमध्ये तब्बल 692 व्हिडिओ क्लिप तसेच ११०० हून अधिक छायाचित्रे आढळून आल्याची माहिती पोलिसांनी दिली आहे. या डिजिटल सामग्रीची तपासणी करून त्यातील नेमका मजकूर, संबंधित व्यक्तींची ओळख आणि या सामग्रीचा वापर कोणत्या कारणासाठी करण्यात आला होता, याचा तपास पोलिसांकडून सुरू आहे. प्रकरणाचे गांभीर्य लक्षात घेता डिजिटल पुरावे तपासणे आणि त्यातील माहितीच्या आधारे पुढील तपास करणे पोलिसांसाठी महत्त्वाचे ठरणार आहे.
चेतन कोळी याला ६ ऑगस्ट रोजी नंदुरबार शहरालगतच्या भोणे फाटा परिसरातील पपईच्या शेतात एका अल्पवयीन मुलाला भेटण्यासाठी येणार असल्याची माहिती मिळाल्यानंतर पोलिसांनी सापळा रचून ताब्यात घेतले होते. त्यानंतर पंच व फॉरेन्सिक तज्ज्ञांच्या उपस्थितीत त्याच्या मोबाईलची तपासणी करण्यात आली होती. तपासादरम्यान मोबाईलमध्ये आक्षेपार्ह डिजिटल सामग्री आढळल्याचा पोलिसांचा दावा आहे.
या प्रकरणात अल्पवयीन मुले व युवकांना पैशांचे आमिष दाखवून त्यांच्याशी संपर्क साधणे, जवळीक निर्माण करणे आणि त्यानंतर त्यांचे शोषण केल्याचा आरोप आहे. या प्रकरणातील डिजिटल पुराव्यांची सखोल तपासणी सुरू असून मोबाईलमधील संपर्क, व्हिडिओ क्लिप आणि छायाचित्रांच्या आधारे संभाव्य पीडितांची ओळख पटविण्याचे काम सुरू आहे. प्राथमिक तपासात या प्रकरणाची व्याप्ती मोठी असण्याची शक्यता पोलिसांनी व्यक्त केली आहे.
न्यायालयीन कोठडी वाढल्याने पोलिसांना डिजिटल पुरावे, संपर्कातील व्यक्ती आणि प्रकरणाशी संबंधित अन्य बाबींचा अधिक सखोल तपास करण्यासाठी वेळ मिळणार आहे.
