नंदुरबार l प्रतिनिधी
एनर्जी स्वराज फाउंडेशन, अटल इनोवेशन मिशन, निती आयोग, भारत सरकार यांच्या संयुक्त विद्यमाने आयोजित ऊर्जा साक्षरता अभियानामध्ये सार्वजनिक शिक्षण समिती संचलित श्रीमती हि. गो. श्रॉफ हायस्कूल सहभागी झाले.
सदर अभियानात 550 पेक्षा जास्त विद्यार्थी, पालक व शिक्षक यांनी ऊर्जा साक्षरता अभियानामध्ये सहभाग नोंदविला व प्रमाणपत्र मिळविले. या प्रशिक्षणामध्ये ऊर्जेबद्दल जागृतता निर्माण करण्यात आली आहे. स्वतः सोलर मॅन ऑफ इंडिया प्रोफेसर चेतन सोलंकी यांनी हा कोर्स बनविला आहे.
शाळेच्या या कार्याची नोंद घेवून जागतिक वसुंधरा दिन 22 एप्रिल 2023 रोजी इंदिरा गांधी इंडोर स्टेडियम, न्यू दिल्ली येथे जी 20 इव्हेंट च्या वर्ल्ड लार्जेस्ट ग्लोबल क्लॉक असेंबली अंड डिस्प्ले कार्यक्रमात सहभागी होण्याचा मान मिळाला.
डॉ. जितेंद्र सिंग मिनिस्टर ऑफ सायन्स अँड टेक्नॉलॉजी, भारत सरकार हे मुख्य अतिथी म्हणून उपस्थित होते. निर्धारित केलेल्या वेळेमध्ये क्लायमेट क्लॉक बनवण्यात आली व ती क्लॉक शाळेला भेट म्हणून मिळाली. या कार्यक्रमात महाराष्ट्रातून प्रसन्न दाऊतखाने व शाळेचे अटल टिंकरिंग लॅब प्रमुख राजेंद्र मराठे यांनी सहभाग नोंदविला.
शाळेच्या कार्याची दखल घेऊन कार्यक्रमाच्या ठिकाणी सोलर मॅन ऑफ इंडिया प्रोफेसर चेतन सोलंकी व डॉ. चिंतन वैष्णव, मिशन डायरेक्टर, अटल इनोवेशन मिशन, निती आयोग यांनी शाळेच्या ग्रुप ला भेट देऊन पुढील कार्यासाठी शुभेच्छा दिल्या.
सार्वजनिक शिक्षण समितीचे चेअरमन ॲड. रमणभाई शाह, संस्थेचे सचिव डॉ. योगेश देसाई, प्राचार्या सुषमा शाह, उपमुख्याध्यापक राजेश शाह, पर्यवेक्षिका विद्या सिसोदीया, पर्यवेक्षक जगदीश पाटील, कनिष्ठ महाविद्यालयाचे विभाग प्रमुख चंद्रकांत सोनवणे, शिक्षक व शिक्षकेतर कर्मचाऱ्यांनी अभिनंदन केले.
