नंदुरबार l प्रतिनिधी
नंदुरबार-दोंडाईचा रस्त्यावर रनाळा गावाजवळ ट्रॉला अर्ध्या रस्त्यावर उभा केला असल्याने आयशर वाहन ट्रॉलावर धडकल्याने आयशर चालक बेशुद्ध झाल्याप्रकरणी ट्रॉला चालकाविरोधात गुन्हा दाखल करण्यात आला आहे.
नंदुरबार तालुक्यातील बोरद येथील ज्ञानेश्वर हिरालाल कोळी हे त्यांच्या ताब्यातील आयशर वाहनात (क्र.जी.जे २१ डब्ल्यू ७२६७) दोंडाईचा येथून टरबूज भरुन नंदुरबार-दोंडाईचा मार्गाने जात होते. यावेळी एका ट्रॉलावरील चालकाने त्याच्या ताब्यातील ट्रॉला रनाळा गावाजवळ रस्त्यामध्ये उभा केला असल्यामुळे ज्ञानेश्वर कोळी आयशरसह ट्रॉलावर धडकला.
यात ज्ञानेश्वर कोळी यांना गंभीर दुखापत झाल्याने बेशुद्ध झाले. तसेच आयशरचेही नुकसान झाले. अपघातानंतर ट्रॉला चालक घटनास्थळावरुन पसार झाला. याबाबत ज्ञानेश्वर कोळी यांच्या फिर्यादीवरुन नंदुरबार तालुका पोलिस ठाण्यात ट्रॉला चालकाविरोधात भादंवि कलम २७९, ३३७, ३३८ सह मोटार वाहन कायदा कलम १८४, १३४/१८७ प्रमाणे गुन्हा दाखल करण्यात आला आहे. पुढील तपास पोना.आनंद मोरे करीत आहेत.
