नंदुरबार l प्रतिनिधी
धडगाव तालुक्यातील जुगणीचा हिरीचापडापाडा येथील अंगणवाडी सेविकेने आत्महत्या केल्याप्रकरणी म्हसावद पोलिस ठाण्यात बाल विकास प्रकल्पाधिकाऱ्यासह चौघांविरुद्ध गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, धडगाव तालुक्यातील जुगणीचा हिरीचापाडा येथील अंगणवाडी सेविका अलकाबाई अमिताभ वळवी यांना ४ ऑगस्ट २०२१ पासून मानधन मिळत नव्हते. तसेच बालविकास प्रकल्प अधिकारी किशोर एस.पगारे, रविन हांद्या वळवी, दारासिंग सोन्या वळवी, सरलाबाई रविन वळवी व मालतीबाई दारासिंग वळवी यांनी अलकाबाई वळवी यांना मानसिक त्रास दिला.
या त्रासाला कंटाळून अलकाबाई वळवी यांनी दुचाकीवरुन उडी मारल्याने त्यांच्या डोक्याला गंभीर दुखापत झाली. म्हसावद येथील ग्रामीण रुग्णालयात उपचारासाठी दाखल करण्यात आले असता डॉ.शेख यांनी तपासून मयत घोषीत केले. याबाबत सहाय्यक पोलिस उपनिरीक्षक कशोर नारायण बडगुजर यांच्या फिर्यादीवरुन म्हसावद पोलिस ठाण्यात पाच जणांविरुद्ध भादंवि कलम ३०६, ३४ प्रमाणे गुन्हा दाखल करण्यात आला आहे. पुढील तपास पोलिस निरीक्षक निवृत्ती पवार करीत आहेत.
