नंदुरबार l प्रतिनिधी
पतंगोत्सवात नायलॉन मांजाचा वापर होऊ नये, त्याची विक्री होऊ नये यासाठी पोलिसांकडून विशेष दक्षता घेतली जात आहे. आतापर्यंत ९ गुन्हे दाखल होऊन ३१ हजारांचा मांजा जप्त झाला आहे. तरीही काही ठिकाणी त्याची विक्री होण्याची शक्यता लक्षात घेता जिल्ह्यात पोलिस ठाणेनिहाय पोलिसांची १३ पथके स्थापन करण्यात आली आहेत.
नंदुरबार जिल्ह्यासह असलेल्या गुजरात राज्यातील गावांमध्ये मकरसंक्रांतीचा पतंगोत्सव साजरा करण्यात येतो. पतंगोत्सवाचा आनंद घेण्यासाठी लहानांपासून मोठ्यांपर्यंत सहभागी होत असतात. आपली संस्कृती टिकवत असताना पर्यावरणाची काळजी व सांभाळ करणे हे देखील सर्वसामान्य नागरिकांचे एक कर्तव्य आहे. पतंगोत्सव साजरा करताना नायलॉन मांजा वापरामुळे निसर्गातील बरेच पशु, पक्षी वेळप्रसंगी लोकांना दुखापत होऊन आपला जीव देखील गमवावा लागला आहे. धाग्यामुळे प्राणघातक इजांपासून पक्षी व मानव जीवितांस संरक्षण करण्याची गरज आहे. दुर्मिळ व नष्टप्राय होत असलेल्या निष्पाप पक्ष्यांचे सरंक्षण करणे अत्यंत गरजेचे आहे. नायलॉन मांजाची विक्री करणाऱ्या विक्रेत्यांची माहिती काढून त्यांच्यावर कारवाई करण्याच्या सूचना पोलिस अधीक्षक पी. आर. पाटील यांनी दिल्या होत्या.
नायलॉन मांजाची किरकोळ विक्री किंवा प्रमुख विक्रेत्याचा शोध घेऊन त्यांच्यावर कारवाई करण्यात येईल असे आवाहन केले होते. तरीदेखील नायलॉन मांजाची विक्री करणाऱ्या विक्रेत्यांविरुद्ध नंदुरबार जिल्ह्यात नंदुरबार शहर पोलिस ठाण्याअंतर्गत ४ गुन्हे नंदुरबार उपनगर पोलिस ठाण्यात १, शहादा पोलिस ठाण्यात तर तळोदा पोलिस ठाणे येथे २ गुन्हे असे एकूण ९ नायलॉन मांजा विक्री करणाऱ्या विक्रेत्यांवर कारवाई करून ३१ हजार ९० रुपये किमतीचा नायलॉन मांजा जप्त करण्यात आलेला आहे.
पतंग उडविताना केलेल्या नायलॉन मांजाच्या वापरामुळे विजेच्या तारांवर घर्षण होऊन आग लागणे, उपकेंद्र बंद पडणे, वीज उपकरणे बिघडणे, अपघात घडणे, इजा व जीवित हानी होणे अशा घटना घडण्याची शक्यता नाकारता येत नाही. प्लास्टिक किंवा कृत्रिम वस्तूपासून बनविलेल्या नायलॉन मांजा या नावाने परिचित असलेल्या पक्क्या धाग्याच्या वापराला पतंग उडविण्याच्या सणाच्या वेळी बंदी घालण्यात आलेली आहे. नायलॉन मांजाची किरकोळ विक्री किंवा प्रमुख विक्रेत्यांचा शोध घेऊन त्यांच्यावर पर्यावरण (संरक्षण) अधिनियम १९८६ च्या कलमान्वये कारवाई करण्यात येईल.
ज्या वस्तूंपासून पर्यावरणास हानी पोहोचेल अशा नायलॉन मांजाची विक्री, साठवणूक किंवा हाताळणी करणाऱ्यांवर देखील कारवाई करण्यात येईल तसेच नायलॉन मांजा विक्री व हाताळणी करताना आढळून आल्यास कारवाई करण्यात येईल. तसेच पोलिस नियंत्रण कक्ष, नंदुरबार ०२५६४-२१०१००/२१०११३ यावर संपर्क साधावा असे आवाहन पोलिस अधीक्षक पी. आर. पाटील यांनी केलेले आहे.
