अक्कलकुवा l प्रतिनिधी
अक्कलकुवा तालुक्यातील 44 ग्रामपंचायतीच्या निवडणुकीची मतमोजणी अक्कलकुवा तहसील कार्यालयात संपन्न झाली. यातील १५ ग्रामपंचायतींवर शिवसेना, १३ ग्रामपंचायतीवर भाजपा, तीन ग्रामपंचायतींवर अपक्ष तर उर्वरित ग्रामपंचायतींवर काँग्रेसने दावा केला आहे.
तालुक्यातील 44 ग्रामपंचायतींच्या निवडणुकीसाठी काल मतदान प्रक्रिया पार पडली.
काल झालेल्या मतदानाच्या मतमोजणीची प्रक्रिया आज सकाळी 10.30 वाजता सुरु झाली. मतमोजणीच्या प्रक्रियेसाठी 15 टेबलवर 30 कर्मचारी नियुक्त करण्यात आले होते. 11 फेरीत मतमोजणी पुर्ण झाली. आधीच कोयलीविहिर ग्रामपंचायत बिनविरोध झाली होती. त्यामुळे 44 थेट सरपंच पदासाठी व 409 सदस्यासाठी ही मतदान प्रक्रिया पार पडली होती.
15 ग्रामपंचायतींवर शिवसेनेने,13 ग्रामपंचायतींवर भाजपाने दावा केला असुन 3 ग्रामपंचायतीत अपक्ष उमेदवाराला सरपंच पदाची संधी मिळाली तर उर्वरित ग्रामपंचायती या काँग्रेस पक्षाकडे गेल्याचा दावा करण्यात आला आहे.
खडकापाणी ग्रामपंचायतीच्या सरपंच पदासाठी 2 उमेदवारात सरळ लढत होती. मतमोजणीत दोन्ही उमेदवारांना सारखी मते मिळाल्याने ईश्वर चिठ्ठीद्वारे सोडत काढण्यात आली. त्यात टिमकीबाई ईश्वर वसावे यांची चिठ्ठी निघाल्याने त्यांना विजयी घोषित करण्यात आले. याच ग्रामपंचायतीतील प्रभाग क्रमांक 2 मधुन तीन सद्स्य निवडुन द्यायचे होते. त्यामुळे एका सदस्याला जास्त मते असल्याने विजयी घोषित करण्यात आले तर उर्वरित दोन उमेदवारांना सारखी मते मिळाल्याने त्यांची ईश्वर चिठ्ठीने सोडत काढण्यात आली. गंगापूर येथे ही प्रभाग क्रमांक 2 साठी ईश्वर चिठ्ठीने सोडत काढण्यात येऊन उमेदवार विजयी घोषित करण्यात आले.
मतमोजणीसाठी सकाळपासुन तहसिल कार्यालयाच्या परिसरात कार्यकर्ते व नेते मंडळीचा वावर सुरु होता. प्रत्येक फेरी व ग्रामपंचायतनिहाय मतमोजणी प्रतिनिधींना मतमोजणी कक्षात सोडले जात होते. मात्र प्रवेशद्वारावर कार्यकर्त्यांची मोठी गर्दी होती. तर निकाल ऐकण्यासाठी तहसिल कार्यालयाच्या आवारात लाऊड स्पीकर लावण्यात आले होते.
प्रतिष्ठित उमेदवारांचा पराभव
गंगापुर ग्रामपंचायतीत काँग्रेसच्या विद्यमान सरपंच नोंगाबाई वसावे यांचा पराभव झाला. या ग्रामपंचायतीत पंचायत समितीचे माजी उप सभापती विजय पाडवी यांच्या स्नुषा व विद्यमान पंचायत समिती सद्स्य लक्ष्मी पाडवी यांचादेखील पराभव झाला. खटवानी ग्रामपंचायतीमध्ये नुकतेच शिवसेनेत गेलेले माजी जिल्हा परिषद सदस्य तथा काँग्रेसचे माजी तालुकाध्यक्ष मंगलसिंग वळवी यांना पराभव स्वीकारावा लागला. काँग्रेसच्या पंचायत समिती सदस्या कुंदा वसावे यांचे पती नुकतेच शिवसेनेत प्रवेश केलेले युवक काँग्रेसचे माजी तालुकाध्यक्ष आनंद वसावे यांना ही पराभवाची चव चाखावी लागली. निवडणूकीत शिवसेनेत प्रचंड जोष होता. मात्र त्यांना अपेक्षित यश प्राप्त होऊ शकले नाही.
2 ग्रामपंचायतीत काही लोकांनी बोगस मतदान केल्याच्या तक्रारी प्राप्त झाल्या. मात्र त्या मतदानाच्या दिवशी न केल्यामुळे त्या विचारात घेण्यात आल्या नाहीत.
शिवसेनेचे काही ग्रामपंचायती निवडून आल्यानंतर संपर्क कार्यालयात फटाक्यांची आतिषबाजी करण्यात येत होती. तहसिल कार्यालयाच्या मागे असलेल्या पटांगणात कार्यकर्ते बेभान होऊन जल्लोष करीत होते. मतमोजणीसाठी सरदार सरोवर प्रकल्पाचे उप जिल्हाधिकारी प्रकाश थविल निरीक्षक म्हणून उपस्थित होते. निवासी नायब तहसीलदार दिलीप गांगुर्डे आदींनी मतमोजणीच्या प्रक्रियेवर लक्ष ठेवले.
