नंदुरबार | प्रतिनिधी-
चिनी बनावटीचे फटाके स्वस्त असले, तरी ते अत्यंत प्रदूषणकारी आहेत त्यावर भारत सरकारने बंदीसुध्दा घातली आहे. घातक अश्या चिनी फटाके आणि देवीदेवता आणि राष्ट्रपुरुष यांचे चित्र असलेली फटाके विक्री करणार्‍यांवर कायदेशीर कारवाई करण्याची मागणीचे निवेदन हिंदु सेवा सहाय्य समितीच्या धर्मसेवक नरेंद्र पाटील, राजू चौधरी, गणेश राजपूत, जयेश भोई, उज्वल राजपूत, जितेंद्र राजपूत, मयूर चौधरी यांनी निवासी उपजिल्हाधिकारी सुधीर खांदे, पोलीस अधीक्षक पी. आर.पाटील यांना दिले.
निवेदनात म्हटले आहे की, भारतात गेल्या काही वर्षांपासून चिनी फटाक्यांचे प्रमाण वाढले आहे. या फटाक्यांमध्ये घातक अश्या विषारी पदार्थांचे प्रमाण अधिक आहे. ते तयार करण्यासाठी पोटॅशिअम क्लोराईड आणि पोटॅशिअम परक्लोराईड यांचे रासायनिक मिश्रण वापरले जाते. भारतात या रासायनिक पदार्थांच्या वापरावर बंदी असतांना चिनी बनावटीचे फटाके अवैध मार्गाने देशात येऊन त्याची विक्री होत आहे.
त्यावर कारवाई करून त्याच्या विक्रीस प्रशासनाने बंदी आणावी. तसेच विक्री करणार्‍यांवर कडक कारवाई करावी. तसेच फटाक्यांवर मोठ्या प्रमाणात चित्रांद्वारे हिंदू देवीदेवता आणि राष्ट्रपुरुषांची विटंबना केली जाते ती पूर्णपणे थांबवावी व जे फटाके विक्रेते देवी- देवता यांची चित्रे असलेली फटाके विक्री करतील त्यांच्यावर भा.द.वि. कलम २९५/अ अंतर्गत गुन्हा दाखल करून कठोर कारवाई करावी अशी मागणी निवेदनाद्वारे हिंदु सेवा सहाय्य समितीने केली. पोलीस अधीक्षक पी.आर.पाटील यांनी देवी-देवता, राष्ट्रपुरुष यांचे चित्र असलेल्या फटाके विक्रेत्यांवर कडक कारवाईचे आश्वासन समितीचे शिष्टमंडळाला दिले.
