नंदुरबार | प्रतिनिधी
नंदुरबार शहरालगत असलेल्या बिलाडी ते नारायणपूर रस्त्यावरील एका शेतात एका २२ वर्षीय युवतीचा निर्घृण खून झाला असून तिचा मृतदेह छिन्नविच्छीन अवस्थेत आढळून आला आहे. या घटनेमुळे एकच खळबळ उडाली आहे. याप्रकरणी नंदुरबार शहर पोलीस ठाण्यात अज्ञात इसमाविरूध्द खुनाचा गुन्हा दाखल करण्यात आला आहे.
याबाबत पोलीस सुत्रांनी दिलेल्या माहितीनुसार, नंदुरबार तालुक्यातील बिलाडी- नारायणपुर रस्त्यावर असलेल्या एका शेताजवळ रेल्वे रूळाच्या पाच मिटर अंतरावर एका युवतीचा खून करून त्याठिकाणी मृतदेह फेकून दिल्याचे आढळून आले. याबाबत शेतमालकाने याची खबर पोलीसांना दिली. या माहितीवरून पोलीस घटनास्थळी दाखल झाले. या २२ वर्षीय युवतीचे धडापासून शिर १५ फुट अंतरावर आढळून आले. तसेच तिचा हातही कापलेला आढळला.
ही माहिती मिळताच नंदुरबार जिल्हा पोलीस अधिक्षक महेंद्र पंडीत, अप्पर पोलीस अधिक्षक विजय पवार, उपविभागीय पोलीस अधिकारी सचिन हिरे, स्थानिक गुन्हे अन्वेषण शाखेचे पोलीस निरीक्षक रविंद्र कळमकर, नंदुरबार शहर पोलीस ठाण्याचे पोलीस निरीक्षक अर्जुन पटले, उपनगर पोलीस ठाण्याचे पोलीस निरीक्षक संदिप पाटील यांनी घटनास्थळी भेट देवून पाहणी केली. अज्ञात कारणाने धारदार शस्त्राने सदर युवतीचा निर्घुण खून केल्याचे प्रथमदर्शनी दिसून आले. मृतदेह आढळल्याची माहिती शहरात वार्यासारखी पसरली. त्यामुळे एकच खळबळ उडाली. पोलीस दलाने घटनास्थळी श्वान पथकाला पाचारण केले. श्वानने धानोरा रस्त्यावरील पुलापर्यंत माग काढला. यावेळी फॉरेन्सींग लॅबमध्ये विविध नमुने पाठविण्यात आले. याप्रकरणी पोलीस उपनिरीक्षक गणेश सुर्यवंशी यांच्या फिर्यादीवरून नंदुरबार शहर पोलीस ठाण्यात अज्ञात इसमाविरूध्द भादंवि कलम ३०२, २०१ प्रमाणे गुन्हा दाखल करण्यात आला आहे. पुढील तपास नंदुरबार शहर पोलीस ठाण्याचे पोलीस निरीक्षक अर्जुन पटले करीत आहेत.
दरम्यान, नंदुरबार शहरात पोलीसांनी तपास केला असता परिसरात कुठलीही युवती हरविल्याची माहिती त्यांना उपलब्ध झालेली नाही. त्यामुळे सदर युवती कोण, तीचा खून कोणत्या कारणाने झाला, याबाबत विविध तर्कवितर्क लावण्यात येत आहेत.
