नंदुरबार l प्रतिनिधी
अक्कलकुवा तालुक्यातील आरटीओ चेक नाक्याजवळ वाहनचालक व क्लिनरला काहीएक कारण नसतांना काठीने मारहाण करुन वाहनाची काच फोडून नुकसान केल्याप्रकरणी गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, शहादा तालुक्यातील फत्तेपूर येथील वाहन चालक परवेजखॉ शरीफखॉ पिंजारी व क्लिनर हे त्यांच्या मालकीच्या वाहनाने (क्र.एम.एच.18 बीजी 6224) अक्कलकुवा तालुक्यातील आरटीओ चेक नाक्याजवळून जात होते. यावेळी एका वाहनावरील (क्र.जी.जे. 16 सीएम 3452) चालकाने काहीएक कारण नसतांना परवेजखॉ शरीफखॉ पिंजारी व क्लिनर यांना काठीने मारहाण केली.
तसेच वाहनाच्या चालक साईडचा काच फोडून नुकसान करीत शिवीगाळ केली. याबाबत परवेजखॉ पिंजारी यांच्या फिर्यादीवरुन अक्कलकुवा पोलिस ठाण्यात वाहन चालकाविरोधात भादंवि कलम 324, 504, 427 प्रमाणे गुन्हा दाखल करण्यात आला आहे. पुढील तपास पोहेकॉ.उल्हास ठिंगळे करीत आहेत.
