नंदुरबार l प्रतिनिधी
अक्कलकुवा तालुक्यातील कोयन्यापाडा व चिवलउतार जि.प.शाळा फोडून चोरट्यांनी सुमारे एक लाखाचे साहित्य चोरुन नेल्याची घटना घडली.
याप्रकरणी मोलगी पोलिस ठाण्यात गुन्हे दाखल करण्यात आले आहेत.
याबाबत पोलिस सूत्रांनी दिलेल्या माहितीनूसार, अक्कलकुवा तालुक्यातील कोयन्यापाडा व चिवलउतार येथे जिल्हा परिषदेच्या शाळा आहे. सदर दोन्ही शाळेचे बंद खोलीचे कडीकोयंडा व कुलूप तोडून चोरट्याने आत प्रवेश केला. यावेळी कोयन्यापाडा जि.प.शाळेच्या खोलीत असलेले १८ हजार ३०० रुपये किंमतीच्या दोन सोलर बॅटरी, एक इन्व्हर्टर, एक सिलींग फॅन, एक एलईडी टीव्ही
व जि.प.शाळा चिवलउतार येथून २२ हजार ३०० रुपये किंमतीचे बॅटऱ्या, एक इन्व्हर्टर, एक सिलींग फॅन, एक एलईडी टीव्ही, १२ हजार रुपये किंमतीची सोन्याची चैन, ७ हजार रुपये किंमतीचा एक लॅपटॉप, ९ हजार रुपये किंमतीचे सोन्याचे पॅन्डल असा एकूण दोन्ही शाळेतून ८६ हजार ६०० रुपये किंमतीचे शालेय साहित्य चोरट्यांनी चोरुन नेले.
याबाबत राजू नामू कोकणी व चेतन विलास जोशी यांच्या फिर्यादीवरुन मोलगी पोलिस ठाण्यात अज्ञात चोरट्यांविरोधात भादंवि कलम ४५७, ३८० प्रमाणे गुन्हा दाखल करण्यात आल आहे. पुढील तपास पोहेकॉ.दीपक बुनकर व दिलीप सुर्यवंशी करीत आहेत.
