नंदुरबार l प्रतिनिधी
राज्य शासनाने स्थानिक स्वराज्य संस्थांच्या परिक्षेत्रात नागरी सेवा व सुविधांची कामे करण्याकरीता नंदुरबार नगरपरिषदेच्या प्रभाग क्रमांक 14 व 18 या दोन प्रभागांमधील विविध विकास कामांसाठी पाच कोटी रुपयांचा निधी मंजूर केला आहे. सदर निधी राज्याचे मुख्यमंत्री एकनाथ शिंदे व उपमुख्यमंत्री देवेंद्र फडवणीस यांनी विशेष प्राधान्य देवुन मंजूर केला असून यासाठी माजी मंत्री तथा विद्यमान आ.डॉ.विजयकुमार गावित यांनी केलेल्या पाठपुराव्याला यश आले आहे.
महाविकास आघाडीच्या अडीच वर्षाच्या कार्यकाळात नंदुरबार शहराचा सर्वांगीण विकास थांबला होता. मात्र आता राज्यात सत्तांतर झाल्याने महाविकास आघाडीचे सरकार जाऊन भाजप-शिवसेना युतीचे सरकार आले आहे.
मुख्यमंत्री म्हणून एकनाथ शिंदे यांनी तर उपमुख्यमंत्री म्हणून देवेंद्र फडवणीस यांनी शपथ घेतल्यानंतर कार्यभार सांभाळला असून राज्यातील नगरपरिषद क्षेत्रातील विकास कामांसाठी निधी मंजूर करून आर्थिक सहाय्य केले आहे. गेल्या अडीच वर्षापासून राज्यात थांबलेला विकास कामांना आता सुरुवात होणार आहे.
नंदुरबार नगरपरिषदेच्या प्रभाग क्रमांक 14 व 18 या दोन प्रभागात रस्त्यांसह विविध विकास कामे केली जाणार आहेत. या कामांकरीता निधी मिळवुन देण्यासाठी आ.डॉ.विजयकुमार गावित यांनी वेळोवेळी शासनाकडे पाठपुरावा केला. परंतु मागील अडीच वर्षात महाविकास आघाडीच्या राज्य शासनाने निधी उपलब्ध करून दिला नव्हता.
राज्यात सत्तांतर झाले असून मुख्यमंत्री एकनाथ शिंदे, उपमुख्यमंत्री देवेंद्र फडणवीस यांनी आ.डॉ.विजयकुमार गावित यांच्या मागणीची दखल घेवुन नंदुरबार नगरपरिषदेच्या प्रभाग क्रमांक 14 व 18 मधील विकास कामांसाठी पाच कोटी रुपयांचा निधी मंजूर केला आहे. यामुळे प्रभाग क्रमांक 14 व 18 या दोन्ही प्रभागांमध्ये विविध विकास कामांना चालना मिळणार आहे.
या कामांसाठी निधी मंजूर करुन दिल्याबद्दल आ.डॉ.विजयकुमार गावित यांनी मुख्यमंत्री एकनाथ शिंदे, उपमुख्यमंत्री देवेंद्र फडणवीस यांचे आभार मानले आहे. आ.डॉ.विजयकुमार गावित यांनी केलेल्या पाठपुराव्याला यश आल्याने नंदुरबार नगरपरिषद प्रभागांच्या कामांसाठी निधी मंजूर झाला आहे.
