नंदुरबार | प्रतिनिधी
नंदुरबार शहरातील अट्टल गुन्हेगारास न्यायालयाने ३ वर्ष सश्रम कारावास व २० हजार रुपये दंडाची शिक्षा ठोठावली आहे. दरम्यान नंदुरबार न्यायालयात अतिशय जलदगतीने खटला चालवुन अवघ्या ५० दिवसातच खटल्याची सुनावणी पुर्ण करण्यात आली आहे.
याबाबत अधिक माहिती अशी की, हितेश अशोककुमार जैन रा . न्यु वैशाली नगर , एम . एल . टाऊन नंदुरबार यांचे नंदुरबार शहरातील गणपती मंदीराजवळील दुकानाचे कुलूप तोडून कपाटात ठेवलेले ३० हजार रुपये चोरी झाल्याने त्यांनी नंदुरबार शहर पोलीस ठाण्यात दिलेल्या तक्रारीवरून भा.द.वि. कलम ४५७,३८० अन्वये अज्ञात आरोपीताविरुध्द् गुन्हा दाखल करण्यात आला होता .
सदर गुन्ह्याबाबत संशयीत आरोपी संतोष दिलीप तिजवीज रा . बाहेरपुरा नंदुरबार यास तात्काळ अटक करून त्याच्याकडून रोख १३ हजार ३२० रुपये हस्तगत करण्यात आले . नंदुरबार शहर पोलीस ठाण्याचे पोलीस उप निरीक्षक हेमंत मोहिते यांनी सदर गुन्ह्याचा अत्यंत शास्त्रोक्त पध्दतीने तपास करीत महत्वाचे पुरावे जमा केले होते .
तसेच गुन्हा दाखल झाल्यानंतर आरोपी संतोष तिजवीज याच्याविरुध्द् दोषारोपपत्र मुख्य न्यायदंडाधिकारी , नंदुरबार विनोद चव्हाण यांच्या न्यायालयात २२ दिवसातच सादर केले होते . मुख्य न्यायदंडाधिकारी , नंदुरबार यांनी साक्षीदारांचे जबाब , पंच , जप्त मुद्देमाल आणि परिस्थितीजन्य पुरावे तपास अधिकारी यांची साक्ष तसेच आरोपी संतोष तिजवीत हा सराईत गुन्हेगार असल्याने यासर्व बाबींचा विचार करुन आरोपी हा न्यायालयीन कोठडीत असतांनाच खटला चालविण्याचे ठरविले
मुख्य न्यायदंडाधिकारी , नंदुरबार यांनी अतिशय जलदगतीने खटला चालवुन अवघ्या ५० दिवसातच खटल्याची सुनावणी पुर्ण करुन आरोपी संतोष दिलीप तिजवीज यास ३ वर्ष सश्रम कारावास व २० हजार रुपये दंडाची शिक्षा सुनावली आहे .
सदर गुन्ह्याचा तपास नंदुरबार जिल्ह्याचे पोलीस अधीक्षक पी . आर . पाटील ,अपर पोलीस अधीक्षक विजय पवार , उप विभागीय पोलीस अधिकारी नंदुरबार सचिन हिरे , नंदुरबार शहरपोलीस ठाण्याचे पोलीस निरीक्षक किरणकुमार खेडकर यांच्या मार्गदर्शनाखाली
नंदुरबार शहर पोलीस ठाण्याचे पोलीस उप निरीक्षक हेमंत मोहिते यांनी केला असून न्यायालयात खटल्याचे कामकाज अभियोग पक्षातर्फे सहाय्यक सरकारी अभियोक्ता ऍड . सुनिल पाडवी यांनी पाहिले होते . पैरवी अधिकारी म्हणुन पोलीस हवालदार गणेश धनगर , पोलीस नाईक मनोज साळुंखे , गिरीष पाटील यांनी कामकाज केले आहे .
