नवापूर l प्रतिनिधी
येथील राष्ट्रीय महामार्ग क्रमांक सहाच्या चौपदरीकरणाचे काम शहरालगत अतिशय धीम्या गतीने सुरू असून नागरिक त्रस्त झाले आहेत. यामुळे आता कामाला गती देण्याची अपेक्षा रस्त्यालगत असणाऱ्या व्यावसायिक व सामान्य जनतेकडून व्यक्त केली जात आहे.
राष्ट्रीय महामार्ग क्रमांक सहाच्या चौपदरीकरणाच्या
कामाला अगदी प्रारंभापासूनच अनेक प्रकारच्या अडथळ्यांचा सामना करावा लागला होता. कामाला सुरूवात झाल्यानंतर नागरिकांनी समाधान व्यक्त केले होत. मात्र सदर काम अतिशय धिम्या गतीने सुरू असून बऱ्याच ठिकाणी नद्यांवरील पूल तसेच उड्डाणपुलांचे काम संथगतीने सुरू असल्याने प्रवाशांमध्ये नाराजीचा सूर आहे. तसेच नवापूर शहराच्या प्रवेशद्वाराजवळ दोन्ही बाजूकडील फक्त एकच लेन ( पदर) पूर्ण झाले असल्याने वाहतुकीची कोंडी होत आहे. दोन्ही बाजूकडील दुसऱ्या लेनचे काम अर्धवट कच्च्याअवस्थेत असल्यामुळे धुळीचे लोळ उठत असल्याने वाहनधारकांना अडचणींचा सामना करावा लागतो. कच्च्या रस्त्यावर धुळीचा त्रास होऊ नये यासाठी नियमित पाणी शिंपडण्याची अपेक्षा वाहनधारकांकडून व्यक्त करण्यात येत आहे. तसेच मुख्य प्रवेशद्वारा नजिक असणाऱ्या कॉलनी वासियांना गावात ये-जा करतांना नाहक त्रास सहन करावा लागत असल्याने नागरिक व वाहनधारक यांनी शहरालगत रस्त्याचे चौपदरीकरणाचे काम जलद गतीने व्हावे अशी अपेक्षा व्यक्त केली आहे.
