नंदुरबार l प्रतिनिधी
शासनाच्या योजना तळागाळातील लाभार्थींपर्यंत पोहोचविण्याच्या उद्देशाने नंदुरबार जिल्ह्यातील अक्कलकुवा तालुक्यातल्या दुर्गम भागात असलेल्या वाडीबार गावात बँक ऑफ महाराष्ट्र तर्फे “महा जन समृद्धी” मोहिमे अंतर्गत आर्थिक समावेशन व साक्षरता शिबिराचे आयोजन करण्यात आले.
या कार्यक्रमाच्या अध्यक्षस्थानी खा. डॉ. हिना गावित होत्या. त्यांचे हस्ते दीप प्रज्वलन करून शिबिराचे उद्घाटन करण्यात आले. राज्यस्तरीय बँकर्स कमिटीचे उप महाव्यवस्थापक राजेश देशमुख, बँक ऑफ महाराष्ट्र, जळगाव झोनच्या झोनल मॅनेजर रशमीरेखा पती, डेप्युटी झोनल मॅनेजर संदीप पोटे आदी उपस्थित होते..
पायाभूत सुविधा, शिक्षण, कृषी आणि जलसंधारण, कौशल्य विकास, आरोग्य, आर्थिक समावेशन आदी क्षेत्र निकषांवर ‘महत्त्वाकांक्षी जिल्हे’ म्हणून देशातील १०१ जिल्ह्यांची निवड निती आयोगाने जाहीर केली आहे. यात महाराष्ट्रातील नंदूरबार जिल्ह्यांचा समावेश आहे. आर्थिक समावेशन वाढविण्याकरिता तसेंच २०२५ पर्यंत राज्य आणि राष्ट्रीय मुख्य कार्यप्रदर्शन निर्देशक उद्दिष्टे साध्य करण्यासाठी ‘बँक ऑफ महाराष्ट्र’ तर्फे नंदुरबार जिल्ह्यावर विशेष लक्ष केंद्रित करून, या अंतर्गत जण धन योजने अंतर्गत बँक खाते सुरु करणे, पात्र खातेधारकांना प्रधान मंत्री जीवन ज्योती विमा योजनेचा लाभ मिळवून देणे, प्रधान मंत्री सुरक्षा विमा योजना अंतर्गत विमा उतरविणे. तसेच महिला बचत गट समूह यांना कर्ज वितरण करणे व जनतेला मोहोमेची माहिती देऊन त्यांची आर्थिक साक्षरता वाढविण्याच्या दृष्टीने ह्या मेळाव्याचे आयोजन करण्यात आले होते.
या शिबिरात सुमारे ३० महिला बचत गटानां ३४ लाख ७० हजार रुपयांचे कर्ज मंजुरीचे पत्र, मुद्रा योजना कर्ज मंजुरी पत्र, किसान क्रेडीट कार्ड, बँक खाते पासबुक यांसह विविध लाभाच्या प्रमाणपत्रांचे मान्यवरांचे हस्ते लाभार्थ्यांना वाटप करण्यात आलेत.
संपूर्ण आदिवासी वस्तीचे सुमारे ८१८ लोकसंख्या असलेल्या वाडीबार गावचे मोहीम स्तरावर आर्थिक समावेशन करण्यात आले आहे. या गावात पात्र २३० गावकऱ्यांचा प्रधानमंत्री जीवन ज्योती बिमा योजना व ४३० गावकऱ्यांचे प्रधानमंत्री सुरक्षा बिमा योजने अंतर्गत विमा उतरविण्यात आला आहे. संपूर्ण गाव जनधन खातेधारक झाले आहे. बँक ऑफ महाराष्ट्र मागील काही दिवसांपासून मोहीम स्तरावर काम करत आहे. बँक प्रतिनिधी, अधिकारी व कर्मचारी यांनी वाडीबर गावातील प्रत्येक पाड्यावर/ घरोघरी जाऊन वरील काम पूर्ण केले आहे.
