म्हसावद l प्रतिनिधी
शहादा तालुक्यातील
वडाळी येथे कानुबाई मातेचा उत्सव मोठ्या उत्साहात साजरा करण्यात आकिला. दि.10 एप्रिल रविवारी कानुमातेजवळ बाहेरो लग्नाचा कार्यक्रम संपन्न झाला तर दि.11 एप्रिल सोमवारी कानुमातेची वाजत गाजत मिरवणूक काढण्यात आली.
वडाळी येथील सुशिलाबाई माळी, रमेश माळी व देविदास माळी यांच्या घरी कानुमाता उत्सव व बाहेरो लग्नाचा योग आला होता. यानिमित्त 17 मार्च ते 11 एप्रिल या काळात सलग आठ दिवस विविध धार्मिक कार्यक्रमाचे आयोजन करण्यात आले होते. बाहेरो लग्न सोहळ्यात नऊ जोडप्याचे लग्न लागले, सोमवारी कानुबाई मातेच्या विसर्जन सोहळ्याला सुरुवात झाली. दुपारी एक वाजेपर्यंत बँडच्या धूमधडाक्यात व प्रत्येक गल्लीत नळाच्या पाण्याच्या फवाऱ्यात कानुमातेच्या विसर्जन मिरवणुकीत भाविकांनी विविध पारंपरिक गाण्यांवर खान्देशी नृत्यावर ठेका धरत नृत्य केले. सोबतच फुगड्यांचा खेळ खेळण्याचा मनमुराद आनंद घेतला. कृत्रिम पाण्याचा वापर करून कानुबाई मातेचा विसर्जन सोहळा मोठ्या दिमाखात साजरा करण्यात आला. विसर्जन सोहळ्याप्रसंगी गावाची ईडा पिडा टळू दे, बळीचे राज्य येऊ दे, कोरोनाच सावट टळू दे, पावसाचे आगमन वेळेवर होऊ दे. अशी आराधनाही कानुमातेला भाविकांनी, शेतकऱ्यांनी केली. गावातील माळीवाडा, चौधरी गल्ली, माळी मढी, बाबासाहेब आंबेडकर चौक, शिवाजी नगर तसेच गावाचे प्रवेशद्वार, ग्रामदेवता भवानीमाता चौक आदी विविध चौकातून कानुबाई मातेची विसर्जन मिरवणूक काढली. अखेर दुपारी तापी नदी पात्रात कानुबाई मातेचे विधिवत विसर्जन करण्यात आले.