नंदुरबार l प्रतिनिधी
धडगाव तालुक्यातील त्रिशूल येथे एका महिलेने जादूटोणा केल्याने वडीलांचा मृत्यू झाल्याच्या कारणावरुन तसेच सदर महिला डाकीण असल्याच्या संशयावरुन महिलेला मारहाण केल्याप्रकरणी तिघांविरोधात गुन्हा दाखल करण्यात आला आहे.
याबाबत पोलिस सूत्रांनी दिलेल्या माहितीनूसार, धडगाव तालुक्यातील त्रिशूल येथील आडकीबाई दाज्या वसावे यांनी जादूटोणा केल्याने जहॉँगीर कुंभाऱ्या पावरा यांचे वडील कुंभाऱ्या पावरा यांचा मृत्यू झाल्याचा संशय जहॉँगिर पावरा यांना होता. या कारणावरुन आडकीबाई वसावे यांना जहॉँगिर कुंभाऱ्या पावरा, राधाबाई जहॉँगिर पावरा व आटूबाई कुंभाऱ्या पावरा सर्व रा.त्रिशूल ता.धडगाव यांनी हाताबुक्यांनी मारहाण केली. तसेच शिवीगाळ करीत जिवेठार मारण्याची धमकी दिली. याबाबत आडकीबाई वसावे यांच्या फिर्यादीवरुन धडगाव पोलिस ठाण्यात तिघांविरोधात महाराष्ट्र जादूटोणा अधिनियम कलम ०३ व भादंवि कलम ३२३, ५०४, ५०६, ३४ प्रमाणे गुन्हा दाखल करण्यात आला आहे. पुढील तपास पोलिस निरीक्षक आर.डी.भावसार करीत आहेत.