नंदुरबार l प्रतिनिधी
नागरिकांना सुविधेसाठी ११२ हा शासकीय तक्रार सुविधा क्रमांक सुरु करण्यात आला आहे. मात्र यावर बऱ्याचदा काही खोडसाळ नागरिकांकडून विनाकारण सदरचा क्रमांक डायल करुन लोकसेवकांना त्रास दिला जात आहे. तालुक्यातील विरचक येथील तिघांनी मद्य प्राशन करुन ११२ क्रमांक डायल करुन लोकसेवकास खोटी माहिती दिल्याप्रकरणी तिघांविरोधात गुन्हा दाखल करण्यात आला आहे. यामुळे विनाकारण ११२ क्रमांक डायल करणे तिघांना महागात पडणार आहे.
याबाबत पोलिस सूत्रांनी दिलेल्या माहितीनूसार, नंदुरबार तालुक्यातील विरचक येथील पुनम बाबु वळवी, परदेशी उमेश यादव व दिनकर हरसिंग वळवी यांनी मद्य प्राशन केले. तसेच पुनम बाबु वळवी याने शासकीय तक्रार सुविधा ११२ क्रमांक डायल करुन कुठलीही तक्रार नसतांना नियंत्रण कक्ष नंदुरबार येथे संदेश पाठवून लोकसेवकास खोटी माहिती देवून त्रास दिला. याबाबत पोना.गुलाब तेले यांच्या फिर्यादीवरुन नंदुरबार तालुका पोलिस ठाण्यात तिघांविरोधात भादंवि कलम १८२, ३४ सह ८५ (१) प्रमाणे गुन्हा दाखल करण्यात आला आहे. पुढील तपास पोना.विनायक सोनवणे करीत आहेत.
