नंदुरबार l प्रतिनिधी
येथील डॉ.तेजल विशाल चौधरी यांच्या आयोजनाखाली गेल्या ७ वर्षापासून नंदुरबार येथे सर्व सामाजिक संस्था, समाज मंडळ व विविध महिला मंडळी एकत्र येऊन महिला दिन साजरा करतात. यावर्षी महिला दिनानिमित्त विविध समाज व मंडळाच्या महिलांची स्कुटर रॅली आयोजित करण्यात आली होती. तसेच शहरातील विविध चौकात स्त्री शक्ती तसेच स्त्रीयांद्वारे विविध प्रात्यक्षिके व नृत्य प्रकारही सादर करण्यात आले.
रॅलीला काका-का-ढाबा येथील डॉ.तेजल चौधरी यांच्या निवासस्थानापासून सुरुवात झाली. रॅलीचे औपचारिक उद्घाटन जिल्हा पोलीस अधीक्षक पी.आर.पाटील, प्रांत श्रीमती मीनल करनवाल, डॉ.तेजल चौधरी यांच्या हस्ते झाले. यावेळी पोलीस अधीक्षक श्री.पाटील यांनी उपस्थितीत महिलांना जागतिक महिला दिनाच्या शुभेच्छा दिल्या. यावेळी येथील चौकात आदिवासी संस्कृती दाखविणारा आदिवासी नृत्य प्रकार महिलांनी सादर केला. नंतर रॅली ब्राम्हण महिलांद्वारे सजविलेल्या परशुराम चौकात राजस्थानी ब्राम्हण संस्कृती देखावा होता. नंतर शहीद संत कवलराम साहेब चौकात सिंधी सोशल महिला गृपतर्फे झुलेलाल भगवान प्रतिमा पुजन झाले. सरदार वल्लभभाई प्रवेशद्वाराजवळ रॅलीचे स्वागत गुजर महिलांना वृक्ष भेट देवून केले. नंतर रॅली उड्डाणपुलापासून महात्मा गांधींना नमन करुन सोनार खुंट-जळका बाजार येथे बुरहानी वुमन गृप नंदुरबारकडून सर्व महिलांना मिठाई वाटप व त्यांच्या मशिदमध्ये संस्कृती दर्शन सोहळा आयोजित केला होता. तेथून रॅली मोठा मारुती मंदिर-अंधारे चौक व जुनी नगरपालिका येथे ग्लोरीयस वुमन डान्स गृपकडून सर्व प्रकारचे ऐतिहासिक महिलांवर देशभक्तीपर नृत्य सादर करण्यात आले. नंतर रॅली नेहरु चौकात येऊन तेथे नाभिक समाज व श्रॉफ हायस्कुलकडून पथनाट्य व लहान मुलींचे नृत्य सादर करण्यात आले. तसेच प्यारीबाई ओसवाल शाळेतील मुलींनी अहिल्याबाई होळकर, सिंधुताई सपकाळ, इंदिरा गांधी, किरण बेदी, मदर टेरेसा, लता मंगेशकर इत्यादी महिलांची वेशभूषा करुन श्रद्धांजली अर्पण करण्यात आली. यानंतर नंदुरबार जिल्हा तायक्वांदो असोसिएशनकडून महिला स्वयंसिद्धा कराटेचे प्रात्यक्षिके करण्यात आली आहे.
सर्व महिलांनी व शहरातील नागरीकांनी विविध कार्यक्रमांचा आनंद घेतला. यावेळी सर्व महिलांचा उत्साह ओसंडून वाहत होता. प्रत्येक समाज महिला त्या आपापल्या समाजाच्या पारंपारिक वेशभूषा करुन सहभागी झाल्या. प्रत्येक महिला उपजतच सौंदर्याचं लेणं घेऊन आलेली असते. ते सौंदर्य तिच्या कार्याचे असते. तसेच तिच्यातल्या सुप्त गुणांचे असते. हेच सौंदर्य प्रत्येकीने खुलवावे व आपल्या गुणांना वाव द्यावा, हाच हेतू सर्वांनी साध्य केला.
रॅलीची समाप्ती महिलांनी हळदी-कुंकू व वाण वाटप करुन माहेश्वरी महिला मंडळ व सौ.मनिषा जैन कांकरीया यांनी केली. तसेच रोटरी क्लब नंदनगरीकडून सर्व महिलांना नेहरु चौकात थंड पेयाचे वाटप करण्यात आले.
सदर रॅलीचे आयोजन लायन्स फेमिना, लायनेस क्लब, जैन सोशल प्लॅटीयम गृप, राजस्थानी ब्राम्हण, बुर्हानी वुमन, राष्ट्रीय सेविका समिती, सिंधी सोशल, गुजर महिला मंडळ, नाभिम समाज, तेली समाज, माहेश्वरी समाज, सोनार समाज, ब्राम्हण समाज, गुजराथी समाज महिला मंडळ, याहामोगी माता महिला मंडळ, संत रविदास महिला संघ सहभागी झाले होते, अशी माहिती आयोजिका डॉ.तेजल चौधरी,हिना रघुवंशी व सुप्रिया कोतवाल यांनी दिली.
