‘जिजाऊ ते सावित्री’ उपक्रमात वृषाली खैरनार यांचे कथाकथन

नंदूरबार l प्रतिनिधी
न्यू इंग्लिश स्कूल साक्री येथे ‘जिजाऊ ते सावित्री सन्मान महाराष्ट्राच्या लेकींचा’ हा उपक्रम नुकताच साजरा करण्यात आला. या उपक्रमांतर्गत नवापूर बालविकास प्रकल्पाच्या अंगणवाडी पर्यवेक्षिका व साहित्यिक वृषाली नरेंद्र खैरनार यांनी कनिष्ठ महाविद्यालयीन विद्यार्थी -विद्यार्थिंनीसमोर कथाकथन केले.
११ वी १२ वी तील मुला मुलींच्या परीक्षेतील भितीचा भावनिक उलगडा करणारी ‘नचिकेत’ ही कथा वृषाली खैरनार यांनी कथन केली. सोबतच या कथेतील आशय विषयाशी संबंधित विद्यार्थ्यांच्या भावभावनां विषयी सुसंवाद साधून हितगुज केले. त्यानंतर ग्रामीण जीवनाचे कष्टमय जीवन उलगडून दाखविणारी ‘ओंजळ’ ही कथा सादर केली. या कथाकथनाने वातावरण भावविवश झाले होते.
३ ते १२ जानेवारी दरम्यान झालेल्या या कार्यक्रमांतर्गत विविध उपक्रम राबविण्यात आले. कथाकथन कार्यक्रमाच्या अध्यक्षस्थानी कनिष्ठ महाविद्यालयाचे प्राचार्य ढोले बापू होते. श्रीमती खैरनार यांनी सूत्रसंचालन केले. उपप्राचार्य मा.नरेंद्र तोरवणे शिक्षक प्रतिनिधी काकडे सर, शिक्षिका प्रतिनिधी शिवदे मॅडम, आणि इतर शिक्षक, शिक्षकेतर कर्मचारी उपस्थित होते.