नंदूरबार l प्रतिनिधी
नंदुरबार येथील बस आगारातून शिरपूरकडे आज दि.१० जानेवारी रोजी रवाना झालेली बस परतत असताना दोंडाईचाहून नंदुरबारकडे येत असतांना रामी फाट्यावर दुचाकीवर येत अज्ञात दोघांनी दगडफेक करुन बसच्या मागील काचा फोडून नुकसान केले आहे. यावेळी बसमध्ये वाहकासह २२ प्रवासी होते. सुदैवाने कोणालाही दुखापत झालेली नाही. याबाबत दोंडाईचा पोलिसात गुन्हा दाखल करण्यात आला आहे.
याबाबत सूत्रांनी दिलेल्या माहितीनूसार, दुपारी १२.३० वाजेच्या सुमारास नंदुरबार बस आगारातील बसचालक किरण पवार हे बस (क्र.एम.एच. २० बीएल ३७६८) घेवून शिरपूरकडे रवाना झाले होते. शिरपूरहून परततांना दोंडाईचा येथे प्रवाशांना उतरवून व २२ प्रवाशांना घेवून बस नंदुरबारकडे येत होती. यावेळी नंदुरबार-दोंडाईचा रस्त्यावरील रामी फाट्याजवळ महादेव मंदिरापासून काही अंतरावर दोन अज्ञात इसमांनी दुचाकीवरुन येत मागून बसच्या काचांवर दगडफेक करुन काचा फोडल्या. बसच्या काचा फुटल्यावर बसमधील प्रवाशांनी आरडाओरड केली. किरण पवार यांनी बस थांबविली. सुदैवाने कोणालाही इजा झाली नाही. दरम्यान, घटनास्थळी एस.टी. महामंडळाच्या वरिष्ठ अधिकाऱ्यांसह दोंडाईचा पोलिसांनी भेट देवून पंचनामा केला आहे. सदरची घटना सायंकाळी ४.३० वाजेच्या सुमारास घडली. याप्रकरणी बसचालक किरण पवार यांच्या फिर्यादीवरुन अज्ञाताविरोधात भादंवि कलम ३३६, ४२७, ३४ प्रमाणे दोंडाईचा पोलीस ठाण्यात गुन्हा दाखल करण्यात आला आहे.
