नंदूरबार l प्रतिनिधी
आपण कुठल्याही क्षेत्रात काम करत असताना ते काम जर सकारात्मक विचारांनी, मनापासून व प्रामाणिकपणे करत असू तर आपल्याला आपण करत असलेल्या कामाची पावती नक्कीच मिळते. विस्ताराधिकारी पदापासून ते जिल्ह्याच्या प्रभारी शिक्षणाधिकारी पदापर्यंतचा माझा प्रवास हा मी केलेल्या चांगल्या कामाचाच एक भाग असून त्यासाठी आजपर्यंत मला जि.प. विभागातील सर्व पदाधिकारी, आधिकरी, आपल्या सारखे मुख्याध्यापक, शिक्षक व शिक्षकेतर कर्मचारी यांचे सहकार्य लाभत गेले म्हणून माझ्या कुठल्याही पदाचा अभिमान न बाळगता खाजगी प्राथमिक शाळेचे,मुख्याध्यापक,शिक्षक, शिक्षकेतर कर्मचारी यांचे प्रलंबित प्रश्न लवकरच मार्गी लागतील असे मत नंदुरबार जिल्हा खाजगी प्राथमिक मुख्याध्यापक शिक्षक व शिक्षकेतर वृंद यांच्या संयुक्त विद्यमाने आयोजित सहविचार सभेप्रसंगी जिल्ह्याचे नवनियुक्त प्रभारी शिक्षणाधिकारी डॉ.युनूस पठाण यांनी आपल्या अध्यक्षीय भाषणातून व्यक्त केले.
पुढे त्यांनी आपल्या अध्यक्षीय भाषणातून सहविचार सभेतील प्रमुख विषयांवर चर्चा करत मुख्याध्यापक मान्यतेचे प्रलंबीत प्रश्न त्वरित सोडवण्यात येतील, संचमान्यता त्वरितदेण्यात येतील व ऑनलाईन कामाविषयी वेळोवेळी मार्गदर्शन केले जाईल असे आश्वासीत केले तसेच त्यांनी प्रशासनात केलेल्या उल्लेखनीय कामांचा अनुभव विविध उदाहरणातून दिलेत. जिजाऊ ते सावित्री सन्मान महाराष्ट्राच्या लेकींचा सप्ताह अंतर्गत राजमाता जिजाऊ व क्रांतीज्योती सावित्रीबाई फुले यांच्या प्रतिमेला पुष्पहार अर्पण करून व दीप प्रज्वलनाने कार्यक्रमास सुरुवात झाली. सप्ताह अंतर्गत महिला शिक्षिकांचा गौरव म्हणून प्रातिनिधिक स्वरूपात मुख्याध्यापिका सौ.मीनाक्षी भदाने व सौ सुलभा महिरे, सौ.अनिता चौधरी यांचा सत्कार डॉ.युनूस पठाण साहेब यांच्या हस्ते पुस्तकरुपी भेटवस्तू देऊन सर्व उपस्थित महिलांचा गौरव करण्यात आला.
यावेळेस नवनिर्वाचित प्राथमिक शिक्षणाधिकारी डॉ.युनूस पठाण साहेब यांचाही जिल्हा खाजगी प्राथमिक मुख्याध्यापक शिक्षक व शिक्षकेतर कर्मचारी यांच्या वतीने रोप व पुस्तकरूपी भेटवस्तू देऊन सत्कार करण्यात आला. यानंतर सर्व मुख्याध्यापक, शाळा शिक्षक व शिक्षकेत्तर कर्मचारी यांच्या सूचना, तक्रारी व अडचणी यांचे सामूहिकपणे प्रातिनिधिक स्वरूपात मुख्याध्यापक संघाचे जिल्हाध्यक्ष सुनील पाटील यांनी आपल्या मनोगतातून सादरीकरण केले व ते लवकरच मार्गी लागतील अशी आशा व्यक्त केली.
सभेसाठी उपस्थित प्रमुख अतिथी सुनिल गिरी व योगेश रघुवंशी व पी.के.पवार यांनी आपल्या भाषणातून ऑनलाईन कामांविषयी मार्गदर्शन करत सरल डाटा वरील आधार अपलोड व अपडेट बाबतच्या प्रश्नांचे निराकरण केले. कार्यक्रमासाठी प्रमुख अतिथी म्हणून मुख्याध्यापक संघाचे जिल्हाध्यक्ष सुनील पाटील, प्रल्हाद राजभोज, जिल्हा खाजगी प्राथमिक शाळेतील मुख्याध्यापक, शिक्षक संघटनेचे जिल्हाभरातील पदाधिकारी, मुख्याध्यापक, तंत्रस्नेही शिक्षक व शिक्षकेतर कर्मचारी मोठ्या उपस्थित होते. कार्यक्रमाचे प्रास्ताविक जिल्हा खाजगी प्राथमिक शिक्षक संघटनेचे अध्यक्ष रुपेश चौधरी, सूत्रसंचालन मुख्याध्यापक शशीकांत पाटील व आभार जिल्हा संघटनेचे सचिव मनोज गायकवाड यांनी मानले. सहविचार सभेच्या यशस्वितेसाठी उध्दव पटेल, किरण त्रिवेदी, अकील शेख, यशवंत बोरसे, सतीश काटके, राहूल झाल्टे, मनोज पाटील आदींनी परिश्रम घेतले.
