नंदुरबार l प्रतिनिधि –
स्वच्छ भारत मिशन (ग्रामीण ) च्या अभियाना अंतर्गत शाश्वत उघड्यावरील हागणदारी मुक्ती कार्यक्रम अंतर्गत नंदुरबार तालुक्यातील एकूण ५० ग्रामपंचायतील सरपंच , ग्रामसेवक व निगराणी समितीच्या सदस्यांसाठी ३ दिवसीय प्रशिक्षकांचे प्रशिक्षण नुकतेच संपन्न झाले .
जिल्हा परिषद व पंचायत समिती नंदुरबार, एनईसी फौंडेशन आणि फिनिश सोसायटी यांच्या संयुक्त विद्यमाने या प्रशिक्षणाचे आयोजन तळोदा रोडवरील फिनिश सोसायटीच्या कार्यालयात आयोजन करण्यात आले होते . नंदुरबार तालुक्यात मागील दीड वर्षा पासून फिनिश सोसायटीच्या माध्यमातून शाश्वत स्वच्छता अभियाना अंतर्गत शाश्वत उघड्यावरील हागणदारी मुक्ती कार्यक्रम राबविण्यात येत आहे. या पार्श्वभूमीवर तीन दिवसीय प्रशिक्षणाचे उद्घाटन आणि समारोप नंदुरबार पंचायत समितीचे गट विकास अधिकारी महेश वळवी यांच्या हस्ते करण्यात आले.
यावेळी गट विकास अधिकारी महेश वळवी यांनी उपस्थिताना शाश्वत स्वच्छतेसाठी मनरेगा, माझी वसुंधरा अशा विविध शासकीय योजनांच्या माध्यमातून गावात सांडपाणी आणि घनकचरा व्यवस्थापना संदर्भात नियोजन मार्गदर्शन केले. यावेळी , विस्तार अधिकारी भैयासाहेब निकुंभे यांनी प्रशिक्षणार्थ्यांना गावे शाश्वत उघड्यावरील हागणदारी मुक्ती करण्यासाठी सर्वोपरी प्रयत्न करण्याबाबत मार्गदर्शन केले . प्रशिक्षणात प्रशिक्षक शिवकुमार शर्मा यांनी विविध साधनांचा वापर करत प्रशिक्षणार्थ्यांना स्वच्छ भारत मिशनचा इतिहास आणि उद्देश्य, व्यवहार परिवर्तनाच्या पद्धतींचा अभ्यास, वर्तणूक बदलाच्या पद्धती बाबत मार्गदर्शन केले.
यावेळी सर्व प्रशिक्षनार्थीसाठी ग्राम पंचायत भादवड येथे क्षेत्र भेटीचे आयोजन करण्यात आले होते . यावेळी प्रशिक्षक शिवकुमार शर्मा यांनी पाणी आणि विष्टेचा संबंध (CLTS), अस्वच्छतेमुळे होणारे आजार, शौचालय बांधकामासंदर्भातील तांत्रिक पर्याय, स्व-मूल्यांकन, शाश्वत हागणदारी मुक्तीची गरज इत्यादी विषयांवर मार्गदर्शन केले. प्रशिक्षणात नंदुरबार तालुक्यातील एकूण ५० ग्रामपंचायतील सरपंच आणि ग्रामसेवक, प्रकल्प व्यवस्थापक आकांक्षा बोरकर, निलेश जाधव स्वच्छ भारत मिशन कक्षातील गट समन्वयक प्रीतेश पाटील ,अर्जुन कुडवे , ,निशांत गजभिये, संतोष नागरे, अभिजीत मैनदाड , अनिल पवार, आदिसह अंगणवाडी सेविका, युवक आणि ग्रामस्थ प्रशिक्षणासाठी उपस्थित होते.
