नंदुरबार l प्रतिनिधी
सशक्त समाज निर्मितीसाठी सकारात्मक विचारांची गरज असते. महाकवी जगद्गुरु संत शिरोमणी दिगंबराचार्य विद्यासागरजी महाराज यांचे टपाल पाकिट सामाजिक उत्थानासाठी प्रेरणादायी ठरणार आहे. पूर्वीप्रमाणेच पत्र लेखन करून टपाल पाकिटांचा उपयोग व्हावा तसेच सामाजिक संदेशासाठी दिगंबर जैन समाजाचा प्रयत्न कौतुकास्पद असल्याचे प्रतिपादन जिल्हाधिकारी मनिषा खत्री यांनी केले.
शहरातील दीनदयाल चौकात असलेल्या मुख्य टपाल कार्यालयाबाहेर विद्यासागरजी महाराज यांच्या संस्कृती शासनाचार्य 2021 – 22 सुवर्णमहोत्सवी वर्षानिमित्त आयोजित टपाल पाकिट अनावरण प्रसंगी जिल्हाधिकारी मनिषा खत्री बोलत होत्या. यावेळी कार्यक्रमाच्या अध्यक्षस्थानी धुळे विभागीय डाक अधिक्षक प्रताप सोनवणे होते. व्यासपीठावर दिगंबर जैन समाजाचे प्रतिनिधी पवन झांझरी उपस्थित होते.याप्रसंगी संत शिरोमणी विद्यासागरजी महाराज यांच्या प्रतिमेचे पूजन आणि दीपप्रज्वलनाने कार्यक्रमाचे उद्घाटन झाले. माणिक चौकातील दिगंबर जैन समाजाचे मंदिर आणि परमपूज्य महाकवी आचार्यश्री विद्यासागरजी महाराज यांनी लिहिलेल्या पुस्तकांच्या छायाचित्र असलेल्या पाकिटाचे अनावरण करण्यात आले. जिल्हाधिकारी मनिषा खत्री पुढे म्हणाल्या की, नंदुरबार शहरात दिगंबर जैन समाजांनी वेळोवेळी सामाजिक कार्यात सहभाग घेतला आहे. आजच्या धावपळीच्या युगात देखील टपाल पाकिटाचे महत्त्व पटवून देण्यासाठी दिगंबर जैन समाजाने पुढाकार घेतला ही अत्यंत अभिमानास्पद बाब आहे. या माध्यमातून त्यागमूर्ती संतांचे विचार समाजासाठी आदर्श आणि प्रेरणादायी ठरतील असेही मनिषा खत्री यांनी सांगितले. प्रवर डाक अधीक्षक प्रताप सोनवणे यांनी शासनाच्या टपाल विभागातर्फे विविध योजनांचा लाभ नागरिकांनी घेण्याचे आवाहन केले. संतशिरोमणी विद्यासागरजी महाराज यांच्या कार्याची माहिती सरिता झांझरी यांनी दिली. मंगलाचरण विजय अजमेरा यांनी म्हटले. कार्यक्रमाच्या प्रास्ताविकात सुरेश जैन यांनी या विशेष टपाल पाकिटा संदर्भात माहिती दिली. टपाल पाकिटाचे अनावरण कार्यक्रमाचे आयोजन समस्त दिगंबर जैन समाजातर्फे करण्यात आले. या कार्यक्रमात प्रमुख अतिथींना ग्रंथ भेट देऊन सन्मानित करण्यात आले. गेल्या चाळीस वर्षात जिल्ह्यातील या पहिल्या उपक्रमासाठी झुथालाल अमरचंद जैन सुपर शॉप आणि परिवारातर्फे विशेष सहकार्य लाभले. डाक विभागाचे अधिकारी आहुती रंजन यांनी आभार मानले. कार्यक्रम यशस्वीतेसाठी नंदुरबार दिगंबर जैन समाज आणि नंदुरबार टपाल कार्यालयातील कर्मचाऱ्यांनी परिश्रम घेतले. फोटो कॅप्शन नंदुरबार येथील दिगंबर जैन समाजातर्फे टपाल विभागाच्या माध्यमातून संत शिरोमणी विद्यासागरजी महाराज यांच्या पाकिटाचे अनावरण करताना जिल्हाधिकारी मनीषा खत्री सोबत धुळे डाक अधीक्षक प्रताप सोनवणे, पवन जैन, सुरेश जैन, महेंद्र जैन आदी उपस्थित होते.
