तळोदा l प्रतिनिधी
तळोदा येथील राष्ट्रवादीच्या संपर्क कार्यालयात शिवसेनेचे नेते तथा माजी आमदार चंद्रकांत रघुवंशी यांनी भेट देऊन राष्ट्रवादीचे प्रदेश उपाध्यक्ष उदेसींग पाडवी यांच्या भेट घेत सोबत चहा पान केले. दरम्यान या वेळी पत्रकारांनी विचारलेल्या प्रश्नांची उत्तरे देताना रघुवंशी यांनी सांगितले की, धडगाव निवडणुकांची प्रचारासाठी जात असल्याने सहज भेट दिली. राष्ट्रवादी हा आमचा मित्र व घटक पक्ष असल्याने भेट घेण्याचा आमचा अधिकार असल्याचे म्हणत त्यांनी विनोदी उत्तर पत्रकारांना दिले.
पालिकेच्या निवडणुकाना वर्ष भराच्या अवधी असला तरी शहरात राजकीय हालचालींना गती मिळाली आहे. राष्ट्रवादी काँग्रेस पक्षाच्या वतीने नागरिकांच्या समस्या सोडविण्यासाठी संपर्क कार्यालय सुरू करण्यात आले असून नुकतेच प्रदेश उपाध्यक्ष तथा मा आ.उदेसिग पाडवी यांच्या हस्ते कार्यालयाचे उद्घाटन करण्यात आले. दरम्यान या उद्घाटन सोहळाप्रसंगी श्री.पाडवी यांनी येणारी पालिका निवडणूक महाविकास आघाडी संघटितपणे लढविणार असल्याचे सूचक वक्तव्य केले होते. त्या अनुषंगाने राजकीय चर्चेला उधाण आले होते. रविवारी अचानक शिवसेनेचे चंद्रकांत रघुंवशी यांची झालेली भेट पुन्हा चर्चेचा विषय ठरत आहे. याबाबत राजकीय वर्तुळात तर्क वितरक लावले जात आहे.
दरम्यान याबाबत पत्रकारांनी विचारलेल्या प्रश्नाचे उत्तर देताना चंद्रकांत रघुंवशी यांनी सांगितले की, आगामी निवडणूक आम्ही सोबत लढू शकतो त्यात विशेष नाही आम्ही महाआघाडी मधिल घटक आहोत असे सूचक उत्तर दिले. या भेटीमुळे येणाऱ्या पालिका निवडणुकीत कोणता पक्ष कोणाशी युती व आघाडी करेल याची चर्चा मात्र आता पासून सुरू झाली आहे. परिणामी येत्या पालिका निवडणुकांमध्ये काही ठिकाणी महाविकास आघाडीतील घटक पक्ष एकत्र निवडणूक लढविण्याची शक्यता वर्तवली जात आहे. त्यामुळे साहजिकच भाजपला त्याठिकाणी कडवं आव्हान असल्याचे बोलले जात आहे. या भेटी प्रसंगी राष्ट्रवादी शहर अध्यक्ष योगेश मराठे, नंदुरबारचे माजी नगराध्यक्ष व विद्यमान नगरसेवक कुणाल वसावे, नगरसेवक हितेंद्र क्षत्रिय, संदीप परदेशी, कृ,ऊ, बा, समितीचे संचालक भरत चौधरी, कमलेश पाडवी, केशरसिंग क्षत्रिय गणेश पाडवी, राहुल पाडवी, फारुक मेमन, गणेश राणे, नदीम बागवान, योगेश पाडवी, यु.रा.काँ.तालुका अध्यक्ष कमलेश पाडवी, आरिफ शेख, आदिल शेख,जितेंद्र केदार, मनोज खैरनार, इम्रान सिकलिकर, प्रकाश पाडवी, संजय वाणी, आदी उपस्थित होते
कार्यालयाची केली प्रशंसा
मा.आ. चद्रकांत रघुवंशी यांनी कार्यालयाची प्रशंसा केली. व संबधित कारगीरास नंदुरबार येथे बोलावून तेथे देखील असे कार्यालय तयार करण्याचे त्यांना सांगितले.
