नंदुरबार l प्रतिनिधी
महाराष्ट्र पर्यटन संचालनालयामार्फत स्थानिक प्रसिद्ध पर्यटन स्थळी पर्यटकांसाठी टूर गाइडची व्यवस्था करून या माध्यमातून स्थानिक युवकांना रोजगार मिळवून देण्याच्या हेतून राज्यातील 14 पर्यटनस्थळी सुलभ मार्गदर्शक (ट्रॅव्हल गाइड) प्रशिक्षण राबविण्यात येणार आहे. पर्यटन संचालनालयाच्या उपसंचालक मधुमती सरदेसाई- राठोड यांनी प्रसिध्दीस दिलेल्या पत्रकान्वये ही माहिती दिली आहे.
या पर्यटनस्थळांमध्ये नाशिक शहर, अहमदनगर शहर, भंडारदरा (अहमदनगर), रायगड जिल्ह्यातील श्रीवर्धन, अलिबाग, मुरुड, फलटण (सातारा), मुरबाड, जुन्नर (पुणे), सिंधुदुर्ग, संजय गांधी राष्ट्रीय उद्यान (मुंबई उपनगर), औरंगाबाद, रत्नागिरी, लोणार (बुलडाणा) यांचा समावेश आहे.
इंडियन इन्स्टिट्यूट ऑफ टुरिझम व ट्रॅव्हल मॅनेजमेंट, ग्वाल्हेर तसेच महाराष्ट्र पर्यटन संचालनालयातील तज्ज्ञ प्रशिक्षणार्थींना मार्गदर्शन करतील. पाच दिवसांचा प्रशिक्षण कालावधी पूर्ण केल्यावर महाराष्ट्र पर्यटन संचालनालयातर्फे प्रमाणपत्र व पुढे टूर गाइड म्हणून कामासाठी ओळखपत्र देण्यात येईल.
पात्रतेचे निकष असे : 18 वर्षांच्या पुढे, शिक्षण : वय वर्षे 40 खालील इच्छुकांसाठी किमान बारावी उत्तीर्ण, तर 40 वर्षांवरील इच्छुकांसाठी किमान दहावी उत्तीर्ण. फिरस्तीची आवड एका स्थिर करिअरमध्ये बदलण्यासाठी अधिकाधिक तरुणांनी सुलभ मार्गदर्शक प्रशिक्षण उपक्रमाचा लाभ घ्यावा, असे आवाहन महाराष्ट्र पर्यटन संचालनालयातर्फे करण्यात आले आहे.
इच्छुकांनी महाराष्ट्र पर्यटन विभागाच्या https://www.maharashtratourism.gov.in/web/mh-tourism/certified-guide-traning या संकेतस्थळावर 31 डिसेंबर 2021 पूर्वी अर्ज करावा. अधिक माहितीसाठी www.maharashtratourism.gov.in या संकेतस्थळाला भेट द्यावी, असे आवाहन करण्यात आले आहे.
