नंदुरबार l प्रतिनिधी
शहरातील मध्यवर्ती भागातील अमृत चौक रामदूत हनुमान मंदिराजवळील उघड्या ड्रेनेजमुळे अनेक नागरिकांना जायबंदी व्हावे लागले. या समस्येचे निराकरण करण्यासाठी निद्रिस्त नगरपालिकेला जाग येईल का ? असा संतप्त सवाल नागरिकांनी उपस्थित केला आहे.
नंदुरबार शहरातील अमृत सिनेमाचौक भागातील रामदूत हनुमान मंदिरालगत रस्त्याच्या मध्यभागी गेल्या अनेक दिवसापासून ड्रेनेजवर् ढापे नसल्यामुळे अनेक ज्येष्ठ नागरिकांना जायबंदी व्हावे लागले. याशिवाय उघड्या ड्रेनेजमध्ये दररोज मोकाट फिरणारी गुरे, कुत्रे, बकऱ्या, पडण्याचे प्रकार नित्याचेच झाले आहेत. यासंदर्भात नगरपालिकेला वेळोवेळी लेखी व तोंडी निवेदन देण्यात आले. परंतु नगरपालिकेचे आरोग्य विभाग आणि बांधकाम विभाग एकमेकांवर जबाबदारी झटकून नागरिकांना खो देण्याचा प्रकार होऊ लागला आहे. ठेकेदार सेवा फाउंडेशन यांच्या मनमानी कारभारामुळे नागरिकांना सेवा देणे ऐवजी मेवा खाण्यात ते मशगुल आहेत. याचबरोबर प्रभागातील नगरसेवकांना देखील या समस्येकडे लक्ष देण्यास वेळ नसल्याचे सांगण्यात येत आहे.यामुळे निद्रिस्त नगरपालिकेला जाग येईल का ? असा संतप्त सवाल परिसरातील नागरिकांकडून व्यक्त होत आहे. येत्या आठ दिवसात नगरपालिकेने उघड्या ड्रेनेजची समस्या सोडली नाही तर नगरपालिकेचे मुख्याधिकारीसह संबंधितांविरुद्ध ग्राहक न्यायालयात याचिका दाखल करण्याचा इशारा मधुकर लॉजचे संचालक राजेंद्र शिंत्रे व डीजे आर्केड कॉम्प्लेक्सचे संचालक रामदास जाधव यांनी दिला आहे.
