नंदुरबार l प्रतिनिधि
मामाचे मोहीदा ता. शहादा शिवारात मुंबई येथील राज्य उत्पादन शुल्क विभागाच्या भरारी पथकाने दबंग कामगिरी करीत परराज्यातील अवैध बियरचे 520 बॉक्स एकूण 21 लाख 25 हजार सहाशे रुपयांचा मुद्देमाल जप्त केला.याप्रकरणी दोघांना अटक करण्यात आली आहे.
याबाबत अधिक माहिती अशी की, राज्य उत्पादन शुल्क भरारी पथक महाराष्ट्र राज्य मुंबई या पथकास खात्रीशीर माहिती मिळाली होती.त्यानुसार मामाचे मोहीदा ता. शहादा शिवारातील नवीन तहसील कार्यालया समोरील रस्त्यावरून मोहिदा रोड ता. शहादा ठिकाणाहून पहाटेच्या सुमारास एका सहाचाकी टाटा कंपनीचा टेम्पो (क्र. जी.जे.-07-जे -7351) या मालवाहू टेम्पो मधून महाराष्ट्र शासनाच्या महसूल बुडवून मध्यप्रदेश राज्यातून आयात केलेल्या व फक्त मध्यप्रदेश राज्यात विक्रीकरता निर्मित केलेल्या परंतु महाराष्ट्र राज्यात विक्रीकरता प्रतिबंधित असलेल्या अवैध बियर साठ्याची विक्री करण्याच्या उदेशाने बेकायदेशीर वाहतूक केली जाणार आहे. सदर बातमीच्या अनुषंगाने केलेल्या कारवाईमध्ये अटक केलेल्या दोन आरोपीच्या ताब्यातून महाराष्ट्र राज्यात विक्रीस प्रतिबंध असलेल्या परराज्यातील अवैध बियरचे 520 बॉक्स जप्त करून त्यांच्या ताब्यातून 21 लाख 25 हजार सहाशे रुपयांचा मुद्देमाल पंचासमक्ष जप्त करण्यात आला आहे. सदर प्रकरणी दोन आरोपींना अटक करण्यात आली असून त्यांच्याविरोधात महाराष्ट्र दारूबंदी कायदा 1949 चे कलम 65-ए, व सी,81,83, 90,अन्वये कारवाई करण्यात आली आहे. सदरची कारवाई कांतीलाल उमाप आयुक्त राज्य उत्पादन शुल्क महाराष्ट्र राज्य यांच्या आदेशानुसार निरीक्षक मनोज चव्हाण तसेच जवान अमोल चिलगर, धनाजी दळवी, अविनाश जाधव यांनी प्रत्यक्ष कारवाईत भाग घेतला, त्यात स्थानिक राज्य उत्पादन शुल्क विभागातील कर्मचारी व अधिकाऱ्यांनी याकार्यवाही दरम्यान मदत केली. सदर गुन्ह्याचे फिर्याद अमोल चीलगर यांनी दिली असून पुढील तपास निरीक्षक राज्य उत्पादन शुल्क मुंबई मनोज चव्हाण हे करीत आहेत.
