नंदुरबार ( प्रतिनिधी ) –
नंदुरबार तालुक्यातील सूजालपुर शिवारात शेतकरी महिलेच्या गळ्यावर धारदार शस्त्राने वार करुन हत्या केल्याची घटना घडली आहे . याप्रकरणी अज्ञाताविरुध्द तालुका पोलीस ठाण्यात खूनाचा गुन्हा दाखल करण्यात आला आहे .
याबाबत पोलीससुत्रांनी दिलेल्या माहितीनुसार , नंदुरबार तालुक्यातील कोरिट येथील रहिवासी उषाबाई हिरामण कोळी ( ४६ ) ही महिला आपल्या शेतात कामासाठी गेली असतांना अज्ञाताने तिच्या गळ्यावर धारदार शस्त्राने वार करुन जिवेठार मारले . मयत उषाबाई कोळी या महिलेचा मृतदेह सुजालपुर | शिवारातील शेतकरी शांतीलाल जतन कोळी यांच्या ऊसाच्या शेतात आढळुन आला . घटनेची माहिती मिळताच अप्पर पोलीस अधिक्षक विजय पवार , उपविभागीय पोलीस अधिकारी सचिन हिरे , स्थानिक गुन्हे अन्वेषण शाखेचे पोलीस निरीक्षक रविंद्र कळमकर , तालुका पोलीस निरीक्षक ए.व्ही.पाटील , सहाय्यक पोलीस निरीक्षक योगेश चौधरी , पीएसआय माळी यांनी घटनास्थळी भेट दिली . अज्ञाताने उषाबाई कोळी यांचा खून करुन पुरावा नष्ट केला . हिरालाल जुलाल कोळी यांच्या फिर्यादीवरुन अज्ञाताविरुध्द नंदुरबार तालुका पोलीस ठाण्यात भादंवि कलम ३०२ , २०१ प्रमाणे गुन्हा दाखल करण्यात आला आहे .याप्रकरणी पुढील तपास पो. नि. ए. व्ही.पाटील करीत आहेत.
