शेकडो वर्षापासून सुरू असलेली सगर उत्सवाची परंपरा वीरशैव लिंगायत गवळी समाजाने यंदाही कायम राखली आहे. मुक्या प्राण्यांप्रति स्नेहभाव जपण्यात आला. शिवशरणार्थ संबोधून शुक्रवारी दुपारी गवळी समाजाचेतर्फे नंदनगरीत सगर उत्सवाची सांगता झाली.
श्रीकृष्णाचे वंशज असलेल्या गवळी समाजात प्रतीवर्षी बलिप्रतिपदा पाडव्याच्या दिवशी गोवर्धन पूजनाचे महत्त्व आहे. याच परंपरेला सगर उत्सव म्हटले जाते. म्हशी आणि रेडे यांना पारंपरिक पद्धतीने सजवून वाजत-गाजत मिरवणूक काढण्यात आली. बालवीर चौक, गवळीवाडा, देसाईपुरा परिसरातून रेड्यांची मिरवणूक काढण्यात आली. ऐतिहासिक सोनी विहिर येथे गवळी समाजाच्यावतीने मानकरी यांच्या उपस्थित शिवशरणार्थ संबोधून पूजन करण्यात आले. यावेळी रेडयांनी सलामी दिली तर म्हशी देखील नतमस्तक झाल्या. कोरोना पार्श्वभूमीवर साध्या पद्धतीने सगर उत्सव साजरा करण्यात आला. सलग दुसऱ्या वर्षीही रेड्यांची झुंज रद्द करण्यात आली होती. इंटरनेट आणि धावपळीच्या युगात देखील गवळी समाजातर्फे ऐतिहासिक नंद गवळी राजाच्या नंदनगरीत दिवाळीनिमित्त शिवशरणार्थ संबोधून आजची युवा पिढी देखील सगर उत्सवाची परंपरा भविष्यात कायम राहील असा विश्वास वीरशैव लिंगायत गवळी समाजाचे नंदुरबार जिल्हा कार्याध्यक्ष महादू हिरणवाळे यांनी व्यक्त केला.
