नंदुरबार l प्रतिनिधी
कोरोना कालावधीत जनतेच्या आरोग्याचे रक्षण करण्यासाठी उल्लेखनीय कार्य केल्याबद्दल नंदुरबार जिल्हा परिषदेचे मुख्य कार्यकारी अधिकारी रघुनाथ गावडे यांचा राज्य शासनातर्फे प्रमाणपत्र देऊन गौरव करण्यात आला आहे. जिल्हाधिकारी श्रीमती मनीषा खत्री यांनी राज्य शासनाचे प्रमाणपत्र मुख्य कार्यकारी अधिकारी रघुनाथ गावडे यांच्या सुपूर्द केले.
कोरोना विषाणूचा प्रादुर्भाव रोखण्यासाठी नंदुरबार जिल्ह्यातील आरोग्य यंत्रणेने मुख्य कार्यकारी अधिकारी रघुनाथ गावडे यांच्या मार्गदर्शनाखाली जिल्हाभर अथक परिश्रम करून कोरोनाची लाट रोखण्यासाठी प्रयत्न केले. जिल्ह्यातील अनेक गावांपर्यंत यामुळे कोरोनाला प्रवेश करता आला नाही.
कोरोनाने जेथे थैमान घातले त्या-त्या ठिकाणी जिल्हा परिषद आरोग्य विभागाचे कर्मचारी मदतीला धावून गेले व नागरिकांना सर्वतोपरी मदत करण्याचा प्रयत्न केला. ग्रामपंचायत स्तरापासून जिल्हा परिषद स्तरावरील सर्व अधिकारी व पदाधिकारी यांच्या प्रयत्नातून ग्राम पंचायत स्तरावर विलगिकरण कक्ष तयार करण्यात आले. जिल्हा परिषदेच्या आरोग्य विभागातील कर्मचाऱ्यांसह शिक्षण विभागातील पर्यवेक्षकीय अधिकारी, कर्मचारी व शिक्षकांनी तसेच ग्राम सेवक, अंगणवाडी सेविका, आशा वर्कर यांनी जीवाचे रान करून लसीकरण मोहीम यशस्वी करण्यासाठी प्रयत्न केले. सीईओ रघुनाथ गावडे यांच्या मार्गदर्शनाखाली कोरोनाला रोखण्यात यश आल्याने आरोग्यमंत्री राजेश टोपे, आरोग्य राज्यमंत्री श्री राजेंद्र पाटील, आरोग्य सचिव डॉ.प्रदीप व्यास व महाराष्ट्र राज्य आरोग्य सेवा आयुक्त डॉ.रामास्वामी एन यांच्या स्वाक्षरीने जिल्हा परिषदेचे मुख्य कार्यकारी अधिकारी रघुनाथ गावडे यांना प्रशस्तीपत्र देऊन गौरविण्यात आले आहे.
