नंदुरबार l प्रतिनिधी
मुख्य निवडणूक आयोगाच्या आदेशानुसार 1 जानेवारी 2022 या अर्हता दिनांकावर आधारित छायाचित्रासह मतदार यादीचा विशेष संक्षिप्त पुनरीक्षण कार्यक्रम घोषित केला आहे. मतदार याद्या पुनरीक्षण कार्यक्रमामध्ये पात्र नागरिकांनी सहभागी होवून नाव नोंदवावे, असे आवाहन जिल्हा निवडणूक अधिकारी तथा जिल्हाधिकारी मनीषा खत्री यांनी केले आहे.
या कार्यक्रमातर्गंत सोमवार 1 नोव्हेंबर 2021 रोजी एकत्रीकृत प्रारुप मतदार याद्या प्रसिध्दी करण्यात येतील. दावे व हरकती 1 नोव्हेंबर 2021 ते 30 नोव्हेंबर 2021 या कालावधीत स्वीकारण्यात येतील. शनिवार 13 नोव्हेंबर, रविवार 14 नोव्हेंबर, शनिवार 27 नोव्हेंबर तसेच रविवार 28 नोव्हेंबर 2021 रोजी विशेष मोहिम राबविण्यात येईल. दावे व हरकती 20 डिसेंबर 2021 पर्यंत निकाली काढून 5 जानेवारी 2022 रोजी मतदार यादीची अंतिम प्रसिद्धी करण्यात येईल.
पात्र नागरिकांनी मतदार नोंदणीसाठी फॉर्म नमुना क्रमांक 6, मृत मतदार, कायमस्वरुपी स्थलांतरीत मतदारांचे मतदार यादीतील नाव नमुना क्रमांक 7, मतदार यादीतील नावांची किंवा तपशीलाची दुरुस्ती करण्यासाठी नमुना क्रमांक 8, मतदारसंघामध्ये स्थलांतर झाले असल्यास नाव नोंदणीकरिता नमुना क्रमांक 8 अ चा वापर करावा.
विशेष संक्षिप्त पुनरीक्षण कार्यक्रमाच्या कालावधीत 1 जानेवारी 2022 रोजी वयाची 18 वर्षे पूर्ण करणाऱ्या अधिकाधिक पात्र नागरिकांनी मतदार म्हणून आपली नावे नोंदवावीत. त्याचबरोबर मृत, दुबार, समान नोंदीदेखील वगळता येतील. तसेच आवश्यक असल्यास पत्त्यात अथवा नावात दुरुस्त्याही करता येतील. यासाठी विहीत नमुन्यातील अर्ज भरुन संबंधित तहसीलदार कार्यालय, मतदान केंद्रस्तरीय अधिकाऱ्यांना नियुक्त केलेल्या ठिकाणी सादर करावेत. कार्यक्रमाबाबत गावाच्या चावडीवर मतदार यादीचे वाचन होणार असून ग्रामसभेचे आयोजन करण्यात आले आहे. राजकीय पक्षांनाही मतदान केंद्रासाठी अभिकर्त्यांची (बीएलओ) नियुक्ती करता येणार असून या बीएलओ कडून दिवसाला 10 मतदार नोंदणीचे अर्ज स्विकारले जाणार आहे. मतदार याद्या पुनरीक्षण कार्यक्रमाचा नागरिकांनी अधिकाधिक लाभ घ्यावा, असेही आवाहन जिल्हाधिकारी श्रीमती खत्री यांनी केले आहे.
