नवापूर पोलिसांची कारवाई; ३५ लाखांचा प्रतिबंधित गुटखा, सुगंधी तंबाखू व कंटेनर जप्त
नंदुरबार l प्रतिनिधी-
नवापूर पोलिसांनी गुप्त माहितीच्या आधारे कारवाई करत महाराष्ट्रात प्रतिबंधित असलेला सुमारे ५ लाख २० हजार रुपयांचा गुटखा व सुगंधी तंबाखू तसेच ३० लाख रुपये किमतीचा कंटेनर असा एकूण ३५ लाख २० हजार रुपयांचा मुद्देमाल जप्त केला. या प्रकरणी कंटेनर चालकाला अटक करण्यात आली आहे.
दि. २६ जून रोजी पोलिस निरीक्षक अभिषेक पाटील यांना गुप्त माहिती मिळाली होती की, सुरत येथून विजयवाडा (आंध्र प्रदेश) येथे जाणाऱ्या एका कंटेनरमधून विविध साहित्याच्या पार्सलमध्ये लपवून प्रतिबंधित गुटखा व सुगंधी तंबाखूची वाहतूक केली जात आहे. त्यानुसार पोलीस अधीक्षक अश्विनी सानप, अपर पोलीस अधीक्षक आशिष कांबळे व उपविभागीय पोलीस अधिकारी सुभाष भोये यांच्या मार्गदर्शनाखाली नवापूर येथील कृणाल हॉटेलजवळ नाकाबंदी करण्यात आली.
रात्री सुमारे २ वाजता आरजे-१९ जीके-१९६३ क्रमांकाचा कंटेनर अडवून तपासणी केली असता त्यामध्ये २.२० लाख रुपये किमतीचा मेजबान जाफरानी जर्दा, ३ लाख रुपये किमतीची सुगंधी तंबाखू आणि ३० लाख रुपये किमतीचा अशोक लेलँड कंपनीचा कंटेनरvअसा एकूण ३५.२० लाख रुपयांचा मुद्देमाल आढळून आला.
अन्न व औषध प्रशासन विभागाच्या अधिकाऱ्यांनी तपासणी करून जप्त केलेला तंबाखू महाराष्ट्रात प्रतिबंधित असल्याचे स्पष्ट केले. त्यानंतर नवापूर पोलीस ठाण्यात अन्न सुरक्षा व मानके अधिनियम तसेच भारतीय न्याय संहितेतील संबंधित कलमान्वये गुन्हा दाखल करण्यात आला.
या प्रकरणी कंटेनर चालक कायमुद्दीन खान सुलतानखान (वय २२, रा. श्यामपूर, जि. बाडमेर, राजस्थान) याला अटक करण्यात आली असून पुढील तपास पोलीस उपनिरीक्षक अभिजीत अहिरे करीत आहेत.
