नंदुरबार । प्रतिनिधी
नंदुरबार येथील नगरपालिकेच्या मुख्याधिकाऱ्यांच्या दालनात असभ्य वर्तणूक करुन खुर्त्यांची तोडफोड करणाऱ्या भारतीय जनता पार्टीच्या नगरसेविकेच्या मुलावर कायदेशीर कारवाई करावी , व असभ्य वर्तन करणाऱ्या नगरसेवकांचे सदस्यत्व रद्द करावे , असा ठराव करीत सत्ताधारी गटाच्या नगराध्यक्षांसह सर्व नगरसेवकांनी जिल्हाधिकारी यांच्याकडे दाखल केला आहे .
याबाबत काँग्रेस व शिवसेनेच्या नगरसेवकांनी नगराध्यक्षांना दिलेल्या निवेदनात म्हटले आहे की , नंदुरबार नगरपरिषदेच्या कार्यलयात विरोधी पक्षाचे नगरसेवक कार्यालयीन वेळेत कार्यालयात येवून धुमाकुळ घालत असतात . यापूर्वी सुध्दा नंदुरबार नगरपरिषदे मुख्याधिकारी गणेश गिरी असतांना नगरसेविकेचे पुत्र लक्ष्मण माळी व विरोधी नगरसेवक यांनी खुर्च्याची नासधुस केली होती . आता दि . 20 ऑक्टोंबर 2021 रोजी मुख्याधिकारी राजेंद्र शिंदे यांच्या उपस्थितीत नगरसेविकेचा पुत्र लक्ष्मण माळी व इतर नगरसेवकांनी खुर्च्या तोडून आरडाओरड केली तसेच शिवीगाळ केली . मुख्याधिकारी राजेंद्र शिंदे हे याघटनेचे साक्षीदार असून त्यांच्या दालनातील तसेच नगरपालिकेतील सी.सी.टी.व्ही . कॅमेऱ्यातून सुध्दा याघटनेचा उलगडा झाल्याशिवाय राहणार नाही . त्यामुळे नगरपरिषदेमध्ये शिवीगाळ करणाऱ्या , दादागिरीची भाषा करणाऱ्या सिंधुताई माळी , त्यांचा मुलगा लक्ष्मण माळी तसेच नगरसेवकांवर कायदेशीर कारवाई करण्यासाठी आजच्या सर्वसाधारण सभेमध्ये ठराव घ्यावा व असभ्य वर्तवणूक करणाऱ्या नगरसेवकांचे सदस्यत्व कमी करण्यासाठी जिल्हाधिकाऱ्यांकडे प्रस्ताव सादर करावा , अशी मागणी केली . या निवेदनावर उपनगराध्यक्ष रवींद्र अशोक पवार , प्रमोद ओंकार शेवाळे , मेमन मनसा अगली , कुरेशी फहमीदा बानो दियाम , परवेज करामत खान यांच्यासह सत्ताधारी गटातील नगरसेवकांच्या स्वाक्षऱ्या आहेत .
दरम्यान , निवेदनाची दखल घेत नगराध्यक्ष रत्ना रघुवंशी यांनी लगेचच हा ठराव मंजूर करून नगरसेवकांसमवेत जाऊन भेट जिल्हाधिकाऱ्यांची भेट घेतली . जिल्हाधिकारी मनिषा खत्री यांना सदर मंजूर झालेला ठराव सादर केला .
