नंदुरबार l प्रतिनिधी-
अखिल भारतीय विद्यार्थी परिषदेच्या नवीन वास्तूचे भूमिपूजन म्हणजे राष्ट्रसेवा आणि समाजसेवेच्या भव्य कार्याची पायाभरणी आहे. या माध्यमातून नंदुरबार जिल्ह्यातील विद्यार्थ्यांमध्ये देशाप्रती समर्पित भाव उंचावणारे कार्य निश्चितच वेगाने घडेल; अशा शब्दात माजी मंत्री तथा विद्यमान भाजपाचे आ. डॉक्टर विजयकुमार गावित यांनी अखिल भारतीय विद्यार्थी परिषदेच्या नूतन वास्तूच्या भूमिपूजनाला शुभेच्छा दिल्या.
अखिल भारतीय विद्यार्थी परिषदेचे राष्ट्रीय सहसंघटनमंत्री देवदत्त जोशी यांच्या प्रमुख उपस्थितीत व संसद रत्न माजी खासदार डॉ. हिना गावीत यांच्या हस्ते अखिल भारतीय विद्यार्थी परिषदेच्या नूतन वास्तूचे भूमिपूजन पार पडले. त्याप्रसंगी व्हिडिओ कॉलच्या माध्यमातून डॉक्टर विजयकुमार गावित यांनी सर्व उपस्थित मान्यवरांशी संवाद साधला आणि शुभेच्छा दिल्या.
अखिल भारतीय विद्यार्थी परिषद ही विद्यार्थ्यांच्या शैक्षणिक समस्यांना घेऊन संघर्ष करण्यासोबतच तरुणाईला व्यक्तिमत्त्व विकासाचे व राष्ट्रप्रेमाचे बाळकडू देण्याचे कार्य गेल्या अनेक वर्षांपासून करत आहे. हाच राष्ट्रसेवा व समाजसेवेचा व्यापक विचार समोर ठेवून वैयक्तिक जीवनात स्थिर झालेल्या जिल्ह्यातील काही कार्यकर्त्यांनी एकत्र येऊन ‘अक्षर बहुउद्देशीय विकास प्रतिष्ठान’ ही विश्वस्त संस्था स्थापन केली आहे. संस्थेच्या वतीने राबविण्यात येणाऱ्या विविध उपक्रमांच्या संचलनासाठी अद्ययावत कार्यालयाची व स्वतंत्र वास्तूची उभारणी सुरू करण्यात येत आहे.
त्या निर्माणाधिन कार्यालयाचे भूमिपूजन अखिल भारतीय विद्यार्थी परिषदेचे राष्ट्रीय सहसंघटनमंत्री देवदत्त जोशी यांच्या प्रमुख उपस्थितीत व संसद रत्न माजी खासदार डॉ. हिना गावीत यांच्या हस्ते पार पडले. म्हाडा कॉलनी, जी.टी.पी. कॉलेजच्या शेजारी, नंदुरबार येथे हे भूमिपूजन करण्यात आले. अभाविप प्रदेश उपाध्यक्षअमोल मराठे , हिम्मतराव चव्हाण, अक्षर बहुद्देशीय विकास प्रतिष्ठान, नंदुरबार चे अध्यक्ष डॉ. गिरीश महाजन, शहर अध्यक्ष भूषण देशपांडे आणि शहरसहमंत्री ओम येवले तसेच संचालक मंडळातील मान्यवरांची प्रमुख उपस्थिती होती. प्रास्ताविक गिरीश महाजन यांनी तर मनोगत संतोष पाटील, दाज्या पावरा, प्रा. दिनेश खरात आदींनी केले.
