नवापुर एमआयडीसीत बनावट तूप कारखान्यावर छापा; दीड कोटींचा मुद्देमाल जप्त
नंदुरबार l प्रतिनिधी-
नवापुर औद्योगिक वसाहतीत सुरू असलेल्या बनावट तूप निर्मितीच्या कारखान्यावर स्थानिक गुन्हे शाखेने धाड टाकत मोठी कारवाई केली. या कारवाईत तब्बल १ कोटी ४६ लाख ५६ हजार ३७० रुपयांचा मुद्देमाल जप्त करण्यात आला असून एका व्यक्तीविरुद्ध गुन्हा दाखल करण्यात आला आहे.
स्थानिक गुन्हे शाखेचे पोलीस निरीक्षक हेमंत पाटील यांना नवापुर एमआयडीसी परिसरात बनावट तूप तयार करून त्याची विक्री केली जात असल्याची गोपनीय माहिती मिळाली होती. या माहितीच्या आधारे स्थानिक गुन्हे शाखेच्या पथकाने अन्न व औषध प्रशासन विभागाच्या अधिकाऱ्यांसह पंचांच्या उपस्थितीत संबंधित कारखान्यावर छापा टाकला.
छाप्यादरम्यान कारखान्यात राकेशभाई ईश्वरभाई भरतिया (वय ४७, रा. सुरत, गुजरात) हा इसम आढळून आला. तपासणीदरम्यान त्या ठिकाणी पामतेल, वनस्पती तूप तसेच विविध रासायनिक पदार्थ आणि फ्लेव्हरचा वापर करून गायीच्या तुपासारखा रंग व वास निर्माण करून बनावट तूप तयार केले जात असल्याचे उघड झाले.
तयार केलेले हे बनावट तूप ओरिया काऊ तूप, शुभ प्रीमियम काऊ तूप, लाभ काऊ तूप आणि राधे कृष्णा काऊ तूप या नावाने पॅक करून बाजारात विक्रीसाठी पाठविले जात असल्याचेही तपासात समोर आले आहे.
कारवाईदरम्यान पामतेल, बनावट तूपाने भरलेले डबे, विविध क्षमतेच्या साठवण टाक्या, पॅकिंग यंत्र, छपाई यंत्र, बॉयलर, विद्युत मोटारी, गॅस सिलिंडर, रासायनिक फ्लेव्हर, बीटा-कॅरोटीन तसेच इतर साहित्य असा १ कोटी ४६ लाख ५६ हजार ३७० रुपयांचा मुद्देमाल जप्त करण्यात आला.
या प्रकरणी राकेशभाई भरतिया याच्याविरुद्ध कोणताही परवाना नसताना भेसळयुक्त व मानवी आरोग्यास घातक असे तूप तयार केल्याप्रकरणी भारतीय न्याय संहिता कलम १२३, २७४ तसेच अन्न सुरक्षा व मानके कायद्यान्वये नवापुर पोलीस ठाण्यात गुन्हा दाखल करण्यात आला असून पुढील तपास सुरू आहे.
ही कारवाई जिल्हा पोलीस अधीक्षक श्रवण दत्त एस. व अप्पर पोलीस अधीक्षक आशित कांबळे यांच्या मार्गदर्शनाखाली स्थानिक गुन्हे शाखेचे पोलीस निरीक्षक हेमंत पाटील, पोलीस उपनिरीक्षक विकास गुंजाळ, तसेच पोलीस कर्मचारी मुकेश तावडे, मनोज नाईक, दादाभाई वाघ, विशाल नागरे, रमेश साळुंखे, सचिन वसावे, अभय राजपूत व रामेश्वर चव्हाण यांनी केली.
