नंदुरबार l प्रतिनिधी-
नंदुरबार येथील श्री स्वामी समर्थ सेवा केंद्रात श्रीदत्त जयंतीनिमित्त आयोजित अखंड नामजप यज्ञ सप्ताहाची सांगता आज भक्तिमय वातावरणात करण्यात आली. गेल्या सात दिवसांपासून सुरू असलेल्या या धार्मिक उपक्रमाचा आज सत्यदत्त पूजनाने विधिवत समारोप करण्यात आला.
श्री स्वामी समर्थांच्या चरणी नमन करून सेवेकरी व मान्यवरांच्या उपस्थितीत पारंपरिक पद्धतीने सत्यदत्त पूजन पार पडले. यानंतर श्री स्वामी समर्थ महाराजांची नैवेद्य आरती मोठ्या भक्तिभावाने करण्यात आली.महाआरती नंतर महाप्रसादाचे आयोजन करण्यात आले होते. सकाळपासूनच सेवेकरी व भाविकांची गर्दी केंद्रात दिसून आली.
अखंड नामजप सप्ताहात विविध धार्मिक कार्यक्रम, स्वामी समर्थांचे अभंग, स्तोत्रांचा सामूहिक जप,होम हवन, ध्यान साधना सेवा केंद्रात पार पडली.
श्री दत्त जयंतीनिमित्त आयोजित अखंड नामजप यज्ञ सप्ताहात नंदुरबार शहरासह तालुक्यातील असंख्य सेवेकरींनी गुरुचरित्र पाराण्याच्या सेवेत सहभाग घेतला. तसेच श्री स्वामी समर्थ सेवा केंद्रात श्री स्वामी समर्थ मंत्र जप 56 लक्ष 14 हजार 596 एवढे झाले तर, श्री नवार्णव मंत्र जप 4 लक्ष 64 हजार 184 ,श्री गायत्री मंत्र जप ,3 लक्ष 34 हजार 908 ,श्री महामृत्युंजय मंत्र जप ,2 लक्ष 84 हजार 40, श्री रुद्र पाठ 79, दुर्गा सप्तशती पाठ ,254 श्री स्वामी समर्थ सारामृत पाठ 441, श्री मल्हारी सप्तशती पाठ 157 यासह श्री गणेश व मनोबोध याग, नवचंडी याग , रुद्र याग ,गीताई याग श्री स्वामी समर्थ याग ,एवढी सेवा श्री स्वामी समर्थ सेवा केंद्रात सप्ताह दरम्यान करण्यात आली.
तसेच 5 जानेवारी रोजी उज्जैन येथे श्री महाकाल मंदिर येथे लिंगारचन सोहळा पार पडणार आहे या बद्दल उपस्थित सेवेकरींना माहिती देण्यात आली. या सांगता सोहळ्याने या आध्यात्मिक सप्ताहाला मंगलमय पूर्णविराम मिळाला.या सप्ताहात श्री स्वामी समर्थ सेवा केंद्राच्या सर्व सेवेकऱ्यांनी परिश्रम घेतले व श्री स्वामी समर्थांच्या कृपेने येत्या वर्षातही अशा धार्मिक उपक्रमांना उत्साहाने सहभागी होण्याचा संकल्प व्यक्त केला.
