नंदुरबार l प्रतिनिधी
थोर योद्धा, वीर शिरोमणी महाराणा प्रतापसिंह यांच्या 485 व्या जयंतीनिमित्त श्री महाराणा प्रताप युवक मंडळ आणि समस्त राजपूत समाजातर्फे भव्य मिरवणूक काढण्यात आली. विविध कसरती, नृत्य आणि देखाव्यांनी नंदनगरीवासियांचे लक्ष वेधले होते.
गुरुवारी सायंकाळी पाच वाजेच्या सुमारास चैतन्य चौकातून मिरवणुकीस प्रारंभ झाला. सजविलेल्या बग्गी रथातून सजीव देखावा साकारण्यात आला. यावेळी हिरामण पाटील या युवकाने महाराणा प्रतापसिंह यांची वेशभूषा परिधान केली होती. याचबरोबर अग्रभागी आदिवासी ढोल नृत्य पथक तसेच नाशिक येथील मशालधारी युवतींचे पथक लक्षवेधी ठरले. भगवे ध्वज, अश्वधारी घोडेस्वार युवक तसेच महिला मोठ्या संख्येने मिरवणुकीत सहभागी झाले होते. ढोल ताशांचा गजर आणि डीजेच्या तालावर श्री महाराणा प्रतापसिंह जयंती मिरवणुकीस प्रारंभ झाला.
सिद्धिविनायक चौक आणि सुभाष चौकात पिंपळनेर व नाशिक येथील पथकाने अद्भुत कसरतींचे प्रदर्शन केले. वीर शिरोमणी महाराणा प्रतापसिंह यांच्या शौर्यगाथेचे गीत आणि हर हर महादेवच्या जयघोषाने परिसर दुमदुमुन होऊन गेला होता. महाराणा प्रताप युवक मंडळाचे अध्यक्ष मोहिनीराज राजपूत यांच्या नेतृत्वाखाली उत्सव समितीचे अध्यक्ष मोहित राजपूत, अजयसिंग राजपूत, ॲड. अविनाश पाटील आणि समाज बांधवांनी संयोजन केले.
चैतन्य चौक,काका गणपती, देसाईपुरा, सिद्धिविनायक चौक, मंगळ बाजार, सुभाष चौक, जुनी नगरपालिका, आमदार कार्यालय, शिवसेना भवन, पंडित दीनदयाल चौक, डी. आर. हायस्कूल मार्गे महाराणा प्रतापसिंह पुतळा परिसरात मिरवणूक पोहोचली. महाराणा प्रताप चौकात पूर्णाकृती पुतळ्याचे पूजन करण्यात आले. त्यानंतर महाप्रसाद वितरणाने मिरवणुकीचा समारोप झाला. मिरवणूक मार्ग दरम्यान शहर पोलीस ठाणे तसेच वाहतूक शाखा कर्मचाऱ्यांनी बंदोबस्त ठेवला.
