नंदुरबार l प्रतिनिधी-
डेंग्यू आजाराला प्रतिबंध करण्यासाठी नागरिकांनी साठवलेल्या पाण्याचे योग्यप्रकारे व्यवस्थापन करावे आणि डासांच्या उत्पत्तीची ठिकाणे निर्माण होऊ देऊ नये, तसेच आवश्यक दक्षता बाळगून आरोग्य यंत्रणेला सहकार्य करावे, असे आवाहन जिल्हा हिवताप अधिकारी रविंद्र सोनवणे यांनी एका शासकीय प्रसिद्धी पत्रकान्वये केले आहे.
16 मे हा दिवस राष्ट्रीय डेंग्यू दिन म्हणून साजरा करण्यात येतो. डेंग्यू आजाराविषयी जनतेमध्ये जागृती निर्माण होऊन प्रतिबंधात्मक उपाययोजनेसाठी नागरिकांनी सहकार्य करावे. डेंग्यू आजाराचा प्रसार हा एडिस इजिप्ती या डासांच्या चावण्यापासून होतो. या डासांची उत्पत्ती साठवणूक केलेल्या स्वच्छ पाण्यात होते. नागरीकांनी आपल्या घरातील पाणी साठवणूकीचे भांडे आठवड्यातून एकदा रिकामे व कोरडे करुन भरावे एक दिवस कोरडा पाळण्यात यावा.आपल्या घराच्या आजुबाजूचा परिसर स्वच्छ राहील याची काळजी घ्यावी.
डेंग्यूचे रुग्ण नियमित स्वरुपात आढळत असून डेंग्यू आजाराच्या संख्येत ऑगस्ट, सप्टेंबर नंतर वाढ होतांना दिसते. काही भागात अतिपाऊस,वाढते शहरीकरण, स्थलांतराचे प्रश्न, विविध विकास कामे अशा अनेक कारणामुळे डेग्यू आजाराचे प्रमाणात वाढ होते.
आजाराची लक्षणे
तीव्र डोकेदुखी, डौळ्यांच्या खोबणीत वेदना, सांधेदुखी, अंगावर पुरळ येणे, भूक मंदावणे, उलट्या होणे, प्रसंगी उलट्यातून रक्त येणे, तोंडाला कोरड पडणे, रक्तमिश्रीत काळसर संडास होणे ही डेंग्यू तापाची लक्षणे आहेत.
उपचार
डेंग्यूचा उपचार हा लक्षणांवर आधारीत असून डेंग्यूची लक्षणे आढळ्यास त्वरीत तज्ज्ञ डॉक्टरांच्या मार्गदर्शनाखाली औषधोपचार सुरु करावा.
उपाययोजना
डेंग्यू डासांची उत्पत्ती साठलेल्या पाण्यात होत असल्याने पाणी व्यवस्थापन योग्य रितीने केल्यास डासांची निर्मिती व पर्यायाने हिवताप, डेंग्यूचे प्रमाण शहरात व आपल्या गावात निश्चित कमी होईल. यासाठी घरातील पाणी साठविण्याचे सर्व भांडे आठवड्यातून किमान एकदा घासून पुसून कोडरी करावीत, पाण्याची सर्व भांडी हवाबंद झाकणाने कापडाने झाकावीत, आठवड्यातून एक दिवस ‘कोरडा दिवस’ म्हणून पाळावा, पाण्याच्या साठ्यांना घट्ट झाकण बसवावे,घरासभोवताली असणारे निरुपयोगी टायर, भंगार सामान, फुटक्या वस्तुंची विल्हेवाट लावावी, डासोत्पत्ती स्थाने नष्ट करण्यात यावीत, इमारतीच्या छतावर पाणी साचणार नाही याची काळजी घ्यावी, पक्षी/जनवारे यांच्या पिण्याची भांडी स्वच्छ ठेवावी, घरातील कुलर, फ्रिजचा ड्रिप पॅन नियमित स्वच्छ करावा, गटारी वाहती करावीत आणि छोटे खड्डे व डबकी बुजवावीत, झोपतांना मच्छरदाणीचा, डास प्रतिबंधक साधनांचा वापर करावा, व अंगभर कपडे घालावेत, नष्ट करता न येणाऱ्या मोठ्या डासोत्पत्ती स्थानांमध्ये गप्पी मासे सोडण्यात यावीत.
डेंग्युबाबत लक्षणे आढळल्यास त्वरीत नजीकच्या जिल्हा सामान्य रुग्णालय व प्राथमिक आरोग्य केंद्रात जाऊन मोफत रक्त तपासणी करावी आणि औषधोपचार घ्यावे. तसेच खाजगी लॅब धारकांनी डेंग्यू रुग्णांचे नमूने जिल्हा रुग्णालयात पाठविण्याची कार्यवाही करावी. डेंग्यू या आजाराचे निश्चित निदानासाठी इलायझा टेस्ट ही परिपूर्ण चाचणी आहे. ही चाचणी जिल्ह्यामध्ये शासकीय जिल्हा रुग्णालयातील सेन्टीनल सेन्टर येथे मोफत करण्यात येते, अशी माहिती श्री. सोनवणे यांनी शासकीय प्रसिद्धी पत्रकान्वये दिली आहे.
