नंदुरबार l प्रतिनिधी
विद्यार्थी हा कुटुंबाचा आणि देशाचा विकास बिंदु असून त्याच्या भविष्याचा मार्गदर्शक हा समाज व शिक्षक आहे. विद्यार्थ्याने कुटुंबाच्या परिस्थितीचा विचार उराशी बाळगला पाहिजे. त्याची आर्थिक स्थिति सुधारणे हे त्याने आज ठरवलेल्या ध्येयावर अवलंबून असून स्वप्न बघातांना मोठी बघा व ती पूर्ण करण्यासाठी कसोशीने प्रयत्न केल्यास यश तुमचेच असेल, असे प्रतिपादन सुप्रसिद्ध शल्य विशारद डॉ. विजय पटेल यांनी केले.
नंदुरबार येथील निव्होप्रेरणा फाउंडेशन पुरस्कृत जीवनशैलीशी ताळमेळ उपक्रमांतर्गत आज दि.२८ मार्च रोजी वि.जा.भ.ज माध्यमिक आश्रमशाळा नांदखरे ता. नंदुरबार येथे नंदुरबार जिल्ह्यातील सुप्रसिद्ध शल्य विशारद डॉ.विजय पटेल यांचे हस्ते विद्यार्थ्यांना आरोग्यकिट वाटप करण्यात आले. यावेळी मुख्याध्यापिका सौ प्राप्ती पाटील यांनी सांगितले की, मराठी शाळांतून शिक्षण घेणारा विद्यार्थी हा सर्वसामान्य कुटुंबातून येत असतो. त्याच्यासाठी शालेय स्तरावर शिक्षक प्रयत्नशील आहेतच. पण जेव्हा निव्होप्रेरणा फाउंडेशनसारख्या समाजसेवी संस्था यात सहभागी होतात आणि त्यातही डॉ. विजय पटेल यांच्यासारखे नावाजलेले वैद्यकीय व्यावसायिक शाळेला भेट देतात.
तेव्हा खऱ्या अर्थाने विद्यार्थ्यांचे मनोबल वाढीस लागत असल्याचे मनोगत त्यांनी मांडले. निव्होप्रेरणा फाउंडेशन विद्यार्थ्यांच्या उज्ज्वल भवितव्यासाठी राबवत असलेल्या सामाजिक उपक्रमांची सखोल माहिती संस्थेचे व्यवस्थापक ललित विसपुते यांनी दिली. संस्थेचे विशेष कार्यकारी अधिकारी अनिरुद्ध कंठे यांचे उपक्रमासाठी मार्गदर्शन लाभले. कार्यक्रमाचे आयोजन विभागीय अधिकारी स्वप्नील राजपूत यांनी केले. सूत्रसंचालन भाग्यश्री मोरे यांनी केले. आभार प्रशांत शिंदे यांनी मानले.
