नंदुरबार l प्रतिनिधी-
भारताचा प्रजासत्ताक दिनाचा 76 वा वर्धापन दिन रविवार 26 जानेवारी 2025 रोजी मुख्य शासकीय ध्वजारोहण कार्यक्रम सकाळी 9.15 वाजता पोलीस मुख्यालय, नविन पोलिस कवायत मैदान, स्व.राजीव गांधी मार्ग टोकरतलाव रोड, नंदुरबार येथे राज्याचे कृषि मंत्री तथा नंदुरबार जिल्ह्याचे पालकमंत्री ॲङ माणिकराव कोकाटे यांच्या हस्ते होणार आहे, अशी माहिती जिल्हाधिकारी डॉ. मित्ताली सेठी यांनी दिली आहे.
भारतीय प्रजासत्ताक दिनाच्या 76 वा वर्धापन दिन समारंभाचा मुख्य शासकीय ध्वजारोहण कार्यक्रम 26 जानेवारी 2025 रोजी राज्यभर एकाचवेळी सकाळी 9.15 वाजता करण्यात येणार असल्याने या दिवशी सकाळी 8.30 ते 10.00 च्या दरम्यान ध्वजारोहणाचा किंवा इतर कोणताही शासकीय किंवा अर्धशासकीय समारंभ आयोजित करण्यात येऊ नये.
एखाद्या कार्यालयास अथवा संस्थेला आपला स्वत:चा ध्वजारोहण समारंभ करावयाचा असल्यास त्यांनी तो समारंभ सकाळी 8.30 च्या पुर्वी किंवा 10 वाजेनंतर करावा. ध्वजारोहण कार्यक्रमास लोकप्रतिनिधी, स्वातंत्र्य सैनिक, शहिद जवानांच्या पत्नी, आई, वडील शासकीय अधिकारी, प्रमुख नागरिक, इतर मान्यवर आणि नागरिकांनी उपस्थित रहावे, असे आवाहनही जिल्हाधिकारी डॉ. मित्ताली सेठी यांनी केले आहे.
