शहादा l प्रतिनिधी
शहादा शहरापासून दोन किलोमिटर असलेल्या श्री श्री नारायणपुरम तीर्थ मंदिरातील गिनीज बुक ऑफ रेकॉर्डमध्ये दखल घेतलेल्या जगातल्या विशिष्ट अशा 11 फूट उंच आणि 21 टन वजनाच्या पंचधातूपासून निर्मित शेषशाही विष्णू मूर्ती इंदोर ते शहादा असा 250 किलोमीटरचा प्रवास करून 11 जानेवारी रोजी शहादा येथील मंदिरात दाखल होणार आहे. 12 ते 15 जानेवारी दरम्यान तीन दिवसीय भगवान विष्णू महायात्रेच आयोजन श्री श्री नारायणपुरम तीर्थ मंदिरात करण्यात आले आहे.
इंदोर येथील राजवाडा येथून 9 जानेवारी गुरुवार रोजी सकाळी ही महाकाय मूर्ती भक्तांसहित निघणार असून राहू, महू, ठिकरी, वरुफाटक, जुलवानिया, गुजरी, सेंधवा, निवाली , पानसेमल, खेतिया असा तीन दिवसांचा मार्गक्रमण करीत शहादा येथे 11 जानेवारी 2025 रोजी दाखल होणार आहे. यावेळी 11 जानेवारीला शहादा शहरातून शोभायात्रा काढण्यात येणार आहे. यावेळी सत्संग, भजन, कीर्तन आणि महापूजा असे आयोजन करण्यात आले आहे.
14 जानेवारीला विशाल भक्तिमोत्सवात उत्तरायण महापर्व म्हणजेच संक्रांतीला दुपारी 12 वाजेता ही विराट श्री नारायण मूर्ती निर्माण होत असलेल्या नारायणपूरम येथील नारायण मंदिरातील गर्भगृहात प्रवेश करणार आहे.
12 ते 15 जानेवारी असे तीन दिवस श्री नारायणपुरम तीर्थ मंदिरात सर्व कल्याण महापूजा आणि श्रीमद् भागवत कथेचे देखील आयोजन मंदिर समिती द्वारे करण्यात आले आहे.
या इंदोर ते शहादा विष्णू महायात्रेत महाराष्ट्र, गुजरात मध्य प्रदेश आणि राजस्थान मधील भक्तांचा समावेश राहणार असून या महायात्रेत भगवान विष्णूचे दुर्लभ दर्शन घेण्यासाठी सर्व भाविक भक्तांनी लाभ घ्यावा असे आवाहन श्री श्री नारायणपूरम श्री मंदिराच्या समितीद्वारे करण्यात आले आहे.
