नंदुरबार l प्रतिनिधी
श्री शिवप्रतिष्ठान हिंदुस्थानतर्फे दरवर्षी नवरात्रोत्सवानिमित्त काढण्यात येणाऱ्या दुर्गा माता दौडचे बालवीर चौकात शहीद शिरीषकुमार मित्र मंडळातर्फे पुष्पवृष्टीसह औक्षण करून स्वागत करण्यात आले. याप्रसंगी महिला सुवासिनीं तसेच युवतींनी भगवा ध्वज आणि मशालधारी बालिका व युवतींचे औक्षण करत कुंकुम तिलक केले.
श्री शिवप्रतिष्ठान हिंदुस्तानतर्फे दरवर्षी नवरात्र उत्सवानिमित्त शहरातीलु प्रमुख मार्गावरून दुर्गा दौडचे आयोजन करण्यात येते. यंदा रविवारी चौथ्या माळेच्या दिवशी पहाटे साडेपाच वाजता छत्रपती शिवाजी महाराज नाट्य मंदिरापासून दुर्गादौडला प्रारंभ झाला. अग्रभागी मशाल व भगवा ध्वज हातात घेऊन फेटे परिधान केलेल्या बालिकांनी लक्ष वेधून घेतले.
त्यांच्या सोबत पांढरे वस्त्र, पांढरी टोपी, भगवा ध्वज हातात घेऊन जय श्रीराम… जय मातादी… वंदे मातरमच्या घोषणा देत धारकरी मोठ्या संख्येने सहभागी झाले होते. याशिवाय प्रभू श्रीरामचंद्र, छत्रपती शिवाजी महाराज, छत्रपती संभाजी महाराज, वीर शिरोमणी महाराणा प्रतापसिंह यांच्या प्रतिमा हातात घेऊन युवक सहभागी झाले होते.
दुर्गा दौड छत्रपती शिवाजी महाराज नाट्य मंदिरापासून मोठा मारुती मंदिर, कुंभारवाडा, गवळी वाडा, नवनाथ नगर, नवा भोईवाडा मार्गे बालवीर चौकात पोहोचले. या ठिकाणी शहीद शिरीषकुमार मित्र मंडळातर्फे आकर्षक रांगोळी काढून स्वागत करण्यात आले. यावेळी परिसरातील सुहासिनी महिला व युवतींनी भगवा ध्वज आणि धारकरींचे औक्षण करून पूजन केले. दुर्गा माता दौड स्वागत कार्यक्रमाचे संयोजन शहीद शिरीषकुमार मित्र मंडळाचे संस्थापक अध्यक्ष महादू हिरणवाळे,जी. एस.गवळी, संभाजी हिरणवाळे, विशाल हिरणवाळे, गोपाल गवळी आदींनी स्वागत केले.
आरतीनंतर दौडचा समारोप
खोडाई ( खोडियार ) माता मंदिरात आरती होऊन दुर्गा दौडचा समारोप करण्यात आला. याप्रसंगी शहीद शिरीषकुमार मित्र मंडळाचे अध्यक्ष महादू हिरणवाळे, सौ. सुनिता हिरणवाळे, पत्रकार जगदीश ठाकुर, सौ. रोहिणी ठाकूर, श्रीमती चंदनबाई ठाकूर, छायाचित्रकार नितीन पाटील हे आरतीचे यजमान होते. वंदे मातरम गीताने दुर्गा दौडचा समारोप करण्यात आला.
