नंदुरबार | प्रतिनिधी
नंदुरबार शहरातील बेडु गोविंद नगरात घरफोडीत ३ लाख १० हजार रुपये किमंतीचा मुद्देमाल लंपास करण्यात आला होता.याप्रकरणी स्थानिक गुन्हे शाखेच्या पथकाने शहरातुन सहा विधी संघर्ष बालकांना ताब्यात घेवुन ८ हजार ९५० रुपये किंमतीचा मुद्देमाल हस्तगत केला आहे. शहराच्या मध्यवस्तीत झालेला घरफोडीचा गुन्हा २४ तासाचे आत उघडकीस आणला.
याबाबत पोलीस सुत्रांनी दिलेल्या माहितीनुसार,नंदुरबार शहरातील उपनगर पोलीस ठाण्याच्या हद्दीत असलेल्या बेडु गोविंद नगरात फिर्यादी केदारनाथ जयस्वाल यांच्या घरात घरफोडी झाल्याने उपनगर पोलीस ठाण्यात गुन्हा दाखल करण्यात आला होता . सदर घरफोडीत ३ लाख १० हजार रुपये किमंतीचा मुद्देमाल चोरट्यांनी लांबविला होता . याबाबत स्थानिक गुन्हे शाखेचे पोलीस निरीक्षक रविंद्र कळमकर यांनी स्थानिक गुन्हे शाखेचे पथक स्थापन करुन गोपनिय बातमीदार सक्रीय केले . गोपनिय बातमीदाराकडून मिळालेल्या विश्वसनीय माहीतीनुसार पोनि कळमकर व पथकाने शहरातील माळीवाडा भिलाटीतुन २ विधी संघर्ष बालकांना ताब्यात घेऊन त्यांना विश्वासात घेऊन विचारपुस केली असता त्यांनी त्यांचे ४ साथिदारांसह गुन्हा केल्याचे मान्य केले , गुन्ह्यात चोरीस गेलेला मुद्देमाल त्यांचा एक साथीदाराचे घरी असल्याबाबत सांगितले . त्यानुसार विधी संघर्ष बालकाचे घरी जाऊन झडती घेतली असता त्याचे घरातुन मोठे पितळी पातेले , पितळी परात , पितळी मोठा करंडा ६५ ग्रॅम वजनाचे एक चांदीचे ब्रासलेट , १२ नग पांढर्या धातुच्या अंगठया १० ग्रॅम वजनाचा एक चांदीचा शिक्का त्यावर लक्ष्मीदेवीच चित्र ५ ग्रॅम वजनाची एक चांदीची अंगठी असा एकूण ८ हजार ९५० रुपये किंमतीचा मुद्देमाल हस्तगत करण्यात आला आहे . नमुद ६ विधी संघर्ष बालकांना मुद्देमालासह गुन्ह्याचे पुढील तपास कामी उपनगर पोलीस ठाण्यात हजर करण्यात आले आहे . सदरची कामगिरी ही पोलीस अधीक्षक पी. आर. पाटील, अपर पोलीस अधीक्षक विजय पवार यांच्या मार्गदर्शनाखाली स्थानिक गुन्हे शाखेचे पोलीस निरीक्षक रविंद्र कळमकर पोहवा जितेंद्र तांबोळी , पोना राकेश वसावे , राकेश मोरे , पोशि अभय राजपुत , आनंदा मराठे यांचे पथकाने केली असून शहराच्या मध्यवस्तीत झालेला घरफोडीचा गुन्हा २४ तासाचे आत उघडकीस आणल्याबद्दल पोलीस अधीक्षक पी . आर . पाटील यांनी तपास पथकाचे अभिनंदन केले आहे .
