नंदुरबार l प्रतिनिधी
नवापूर तालुक्यातील आदिवासी महिलेवर पिंपळनेर येथे नराधमांनी तिच्या लहान मुला देखत सामूहिक अत्याचार केला.त्याच्या निषेधार्थ नवापूर तालुका आदिवासी उत्सव व समन्यय समितीतर्फे बंदचे आवाहन करण्यात आले होते. त्याला नागरिकांनी उत्स्फूर्त प्रतिसाद देऊन नवापूर शहरासह तालुका कडकडीत बंद ठेवला.
२७ मे २०२४ रोजी ११:३० वाजता धुळे जिल्ह्यातील पिंपळनेर येथील कृषि उत्पन्न बाजार समिती येथे नवापूर तालुक्यातील आदिवासी महिलेवर तिच्या लहान मुलासमोर सामुहिक बलात्कार केला. या घटनेत दोघांना अटक करण्यात आली आहे. या घटनेनंतर नंदुरबार जिल्ह्यातील विविध आदिवासी संघटना आक्रमक झाले आहेत. आज नवापूर तालुका बंदचे आवाहन करण्यात आले होते .
या आवाहनाला प्रतिसाद देत नागरिकांनी आपले प्रतिष्ठान बंद ठेवले. यावेळी पोलिसांनी मोठा बंदोबस्त लावला होता. या नराधमांना सोडण्यात येऊ नये यांना कठोरात कठोर शिक्षा देण्यात यावी जेणेकरुन ही शिक्षा कायम त्यांच्या स्मरणात राहील व यापुढे कोणीही असे कर्म करणार नाही, पाऊल उचलणार नाही तसेच अशी हिम्मत देखील इतर कोणी भविष्यात करणार नाही या करीता या नराधमांना कठोर शिक्षा करण्याची मागणी नवापूर तालुका आदिवासी उत्सव व समन्यय समितीतर्फे करण्यात आली.
