नंदुरबार l प्रतिनिधी
खूनाच्या गुन्ह्यात आरोपीतास नंदूरबार न्यायालयाने जन्मठेपेची शिक्षा सुनावत 5 हजार रुपयांचा दंड ठोठावला आहे.
अधिक माहिती अशी की, मयत रेखा अरुण नामदास हीचेवर तिचा पती आरोपी अरुण सुकलाल नामदास हा नेहमी चारीत्र्यावरुन संशय घेत होता. 22 जून 2022 रोजी मयत रेखा ही नंदुरबार येथील घरात एकटी असतांना तिचा पती अरुण व तिच्यात भांडण झाले. त्यावेळी तिच्या पतीने रागाच्या भरात घरातील लोखंडी धारदार चाकुने गळा चिरुन तिची हत्या केली होती, म्हणून अशोक देवराम खांडेकर यांच्या फिर्यादीवरून उपनगर पोलीस थन्यात भा.द.वि. कलम 302 प्रमाणे 22 जून 2022 रोजी आरोपीताविरुध्द् गुन्हा दाखल करण्यात आला होता.
सदरचा गुन्हा खून यासारखा गंभीर स्वरुपाचा असल्याने गुन्ह्यातील आरोपी अरुण सुकलाल नामदास वय 36 रा. प्लॉट नं. 30, सरोज नगर, नंदुरबार ता. जि. नंदुरबार यास तात्काळ अटक करण्यात आली होती.
उपनगर पोलीस ठाण्याचे तत्कालीन सहा. पोलीस निरीक्षक दिनेश भदाणे व त्यांचे सहकारी पोलीस शिपाई विपुल पाटील यांनी सदर गुन्ह्याचा अत्यंत शास्त्रोक्त पध्द्तीने तपास करीत महत्वाचे पुरावे जमा केले होते. तसेच गुन्हा दाखल झाल्यानंतर आरोपी अरुण सुकलाल नामदास यांच्या विरुद् दोषारोपपत्र मा. अति. जिल्हा व सत्र न्यायाधीश, नंदुरबार यांचे न्यायालयात सादर केले होते.
अति. जिल्हा व सत्र न्यायाधीश, नंदुरबार एम. आर. नातू यांनी साक्षीदारांचे जबाब, पंच, आणि परिस्थितीजन्य पुरावे तपास अधिकारी यांची साक्ष, सरकारी पक्षाचा युक्तीवाद यासर्व बाबींचा विचार करुन आरोपी अरुण सुकलाल नामदास यास भारतीय दंड संहितेच्या कलम 302 मध्ये जन्मठेपेची शिक्षा व 5000 रुपये दंडाची शिक्षा सुनावली आहे.
सदर खटल्याचे कामकाज पोलीस अधीक्षक पी. आर. पाटील, अपर पोलीस अधीक्षक निलेश तांबे, नंदुरबार विभागाचे उप विभागीय पोलीस अधिकारी संजय महाजन, उपनगर पोलीस ठाण्याचे पोलीस निरीक्षक अजय वसावे यांच्या मार्गदर्शनाखाली सहा. पोलीस निरीक्षक दिनेश भदाणे यांनी केले असून न्यायालयात खटल्याचे कामकाज अभियोग पक्षातर्फे सरकारी अभियोक्ता ॲड. विजय चव्हाण यांनी पाहिले होते. पैरवी अधिकारी म्हणुन पोलीस उप निरीक्षक राहुल भदाणे, पोलीस हवालदार नितीन साबळे व पोलीस नाईक गिरीष पाटील, यांनी कामकाज केले आहे.
तपास अधिकारी व त्यांचे पथक तसेच जिल्हा सरकारी अभियोक्ता श्री. गोसावी, विशेष सरकारी वकील श्री. चव्हाण यांचे पोलीस अधीक्षक पी. आर. पाटील, अपर पोलीस अधीक्षक निलेश तांबे, नंदुरबार विभागाचे उप विभागीय पोलीस अधिकारी संजय महाजन यांनी अभिनंदन केले आहे.
