नंदुरबार l प्रतिनिधी
माहे जानेवारी 2023 ते डिसेंबर 2023 या कालावधीत मुदत संपणाऱ्या ग्रामपचायती, नव्याने स्थापित व सन 2022 मध्ये चुकीची प्रभागरचना झाल्यामुळे निवडणूका न होऊ शकलेल्या ग्रामपंचायतींच्या सदस्य पदासह थेट सरपंच पदाच्या सार्वत्रिक निवडणूकांसाठी संगणक प्रणालीद्वारे तसेच ग्रामपंचायतीतील रिक्त जागांच्या पोटनिवडणूकांसाठी पारंपारिक पध्दतीने राबविण्याचा प्रत्यक्ष निवडणूक कार्यक्रम जाहीर करण्यात आला असल्याची माहिती उपजिल्हाधिकारी गोविंद दाणेज यांनी एका प्रसिध्दी पत्रकान्वये कळविली आहे.
शहादा तालुक्यातील एकूण 16 ग्रामपंचायती व नंदुरबार जिल्ह्यातील एकूण 27 ग्रामपंचायतींचा पोट निवडणूकीचा टप्पेनिहाय कार्यक्रम याप्रमाणे आहे.
शुक्रवार 6 ऑक्टोंबर 2023 रोजी निवडणूक नोटीस प्रसिध्द करणे, सोमवार 16 ऑक्टोंबर ते शुक्रवार 20 ऑक्टोंबर 2023 या कालावधीत सकाळी 11 ते दुपारी 3 वाजेपर्यंत नामनिर्देशनपत्रे मागविणे व सादर करणे, सोमवार 23 ऑक्टोंबर 2023 रोजी सकाळी 11 वाजेपासून नामनिर्देशनपत्र छाननी, बुधवार 25 ऑक्टोंबर 2023 रोजी दुपारी 3 वाजेपर्यंत नामनिर्देशनपत्र मागे घेणे व दुपारी 3 वाजेनंतर निवडणूक चिन्ह नेमून देणे व अंतिमरित्या निवडणूक लढविणाऱ्या उमेदवारांची यादी प्रसिध्द करणे,
रविवार 5 नोव्हेंबर, 2023 सकाळी 7.30 ते सायंकाळी 5.30 वाजेपर्यंत मतदान, सोमवार 6 नोव्हेंबर 2023 रोजी मतमोजणी व निकाल घोषित करणे तसेच नक्षलग्रस्त व दुर्गम भागासाठी मंगळवार 7 नोव्हेंबर 2023 रोजी रोजी मतमोजणी व निकाल घोषित करणे, गुरुवार 9 नोव्हेंबर 2023 रोजी निवडणूक निकालाची अधिसूचना प्रसिध्द करण्यात येईल.
