नंदूरबार l प्रतिनिधी
नंदुरबार जिल्ह्यात आगामी काळात साजरे होणारे सण, उत्सवांच्या काळात किरकोळ कारणांवरून कायदा व सुव्यवस्थेचा प्रश्न निर्माण करुन शांतता भंग करण्याच्या विचारात असणारे समाजकंटक व गुन्हेगारांवर वचक निर्माण व्हावा या उद्देशाने नंदुरबार जिल्हा पोलीस अधीक्षक पी. आर. पाटील यांनी खबरदारी म्हणून नंदुरबार जिल्ह्यातील सर्व पोलीस ठाणे हद्दीत अवैध जनावरांची कत्तलीसाठी वाहतूक, खरेदी विक्री होणार नाही याबाबत सर्व पोलीस ठाणे प्रभारी अधिकारी यांना सुचना दिल्या होत्या.
नाशिक परिक्षेत्राचे विशेष पोलीस महानिरीक्षक, नाशिक परिक्षेत्र, नाशिक मा. डॉ. बी.जी. शेखर पाटील यांच्या आदेशान्वये दि. 26 जुन रोजी रात्री 11 ते 27 जुन रोजीच सकाळी 5 वाजे दरम्यान कोंबिंग / नाकाबंदी ऑपरेशन राबविणेबाबत आदेशीत करण्यात आले होते. कोंबिंग / नाकाबंदी ऑपरेशन दरम्यान इतर प्रकारच्या अवैध धंद्यांबरोबरच कत्तलीसाठी गोवंश जनावरांची वाहतूक होणार नाही याबाबत नंदुरबार जिल्हा पोलीस अधीक्षक पी. आर. पाटील यांनी सर्व पोलीस ठाणे प्रभारी अधिकारी यांना निर्देश दिले होते.
दि. 26 जुन रोजी रात्री नंदुरबार जिल्ह्याचे पोलीस अधीक्षक पी. आर. पाटील यांना गुप्त बातमीदारामार्फत बातमी मिळाली की, नवापूर शहरातील ईस्लामपुरा भागात कत्तलीसाठी अवैधरीत्या जनावरांना बांधून ठेवलेले आहे. सदरची माहिती त्यांनी नवापूर पोलीस ठाण्याचे पोलीस निरीक्षक ज्ञानेश्वर वारे यांना सांगून पुढील कायदेशीर कारवाई करण्याबाबत आदेशीत केले.
त्याअनुषंगाने नवापूर पोलीस ठाण्याचे पोलीस निरीक्षक ज्ञानेश्वर वारे व त्यांच्या पथकाने नवापूर शहरातील इस्लामपुरा कसाईवाडा परिसरात कोंबिंग ऑपरेशन राबविले असता वेगवेगळ्या ठिकाणी लहान बंदीस्त खोल्यांमध्ये 9 लाख 67 हजार रुपये किमतीची 128 गोवंश जनावरे बांधलेल्या अवस्थेत मिळून आले. मिळून आलेल्या सर्व जनावरांची पोलीस पथकाने सुटका करुन त्यांची तातडीने चारापाण्याची व्यवस्था केली. सुटका केलेल्या जनावरांना गोशाळेत दाखल करण्यात आलेले आहे. जनावरांना कत्तलीसाठी बांधून ठेवणाऱ्या इसमांविरुध्द नवापूर पोलीस ठाणे येथे महाराष्ट्र पशु संरक्षण अधिनियम व प्राण्यांचा छळ प्रतिबंध अधिनियमाच्या विविध कलमान्वये गुन्हा दाखल करण्यात आला आहे.
तसेच नंदुरबार शहरातील साक्री नाका येथे लावलेल्या नाकाबंदी दरम्यान एक आयशर वाहन (क्र.एम.एच.18, ए-9801) यात 94 हजार रुपये किमतीच्या 13 जनावरांची अवैध वाहतूक करतांना मिळून आला. म्हणून आयशर वाहन चालकाविरुध्द् नंदुरबार शहर पोलीस ठाणे येथे प्राण्यांचा छळ प्रतिबंध अधिनियमान्वये गुन्हा दाखल करण्यात आला असून जनावरांना पांजरपोळ येथे दाखल करण्यात आले आहे.
त्याचप्रमाणे नंदुरबार शहरात गोमांसाची वाहतूक करणाऱ्या संशयीताकडून 3 हजार 200 रुपये किमतीचे गोमांस तसेच शहादा शहरात गोमांसाची वाहतूक करणाऱ्या संशयीताकडून 5 हजार 600 रुपये किमतीचे गोमांस जप्त करुन दोन्ही इसमांविरुध्द संबंधीत पोलीस ठाण्याला गुन्हे दाखल करण्यात आले आहे.
सदरची कारवाई पोलीस अधीक्षक पी. आर. पाटील, अपर पोलीस अधीक्षक निलेश तांबे यांच्या मार्गदर्शनाखाली नवापूर पोलीस ठाण्याचे पोलीस निरीक्षक ज्ञानेश्वर वारे, नंदुरबार शहर पोलीस ठाण्याचे पोलीस निरीक्षक रविंद्र कळमकर, पोलीस उप निरीक्षक अशोक मोकळ, पोलीस हवालदार दादाभाऊ वाघ, दिनेशकुमार वसुले, पोलीस नाईक सुरेंद्र पवार, अमोल जाधव, प्रेमचंद जाधव पोलीस अंमलदार विक्की वाघ, दिनेश बावीस्कर, रणजित महाले, गणेश बच्छे, पवन काकरवाल, प्रमोद पाटील, समाधान केंद्रे, हेमंतकुमार महाले, किशोर वळवी यांनी केली आहे.
